Shillong, Risaw 11
Haduh 14 tylli ki masi ki la kylla rnga bad baroh ki jingdon-jingem ryngkat bad ka ïing ki la kylla dpei hadien ba ka ding kaba klang bha ka la ïoh ban bam duh naphang. Kane ka jingjia pluh ding ka la jia ha ka por kumba 1 baje mynsngi jong ka Sngi Thohdieng ha shnong Nongmensong jong ka Dong Kadiang.
Wat la ka jingjulor ka la long kaba jur hynrei ym pat shym la lah ban tip pat ïa ka daw tynrai halor ka jingkem ding jong kane ka ïing kaba la sah da u Sunil Kumar Rai bad ka jingkem ding ruh jong ka sem masi kaba don mar syndah bad ka ïing.
Haba ïakren bad u Sunil uba dei u trai jong kitei ki masi, u la ïathuh ba ha ka por ba jia kane ka jingjia, na ka liang jong u um shym la don ha kane ka sem masi kaba don ha syndah ka ïing jong u bad ba ki khun-ki kti jong u ruh ha kane ka por ki dang ïalehkai ha phyllaw ïing bad kynsan-kynsan la shu ïohi ïa ka ding kaba klang kaba la ïeng.
U Sunil u la ïathuh ba u don haduh 15 tylli ki masi bad ba lait im ka don tang kawei, katba 14 tylli pat ki la shah bam lut ha ka ding. U la ïathuh ruh ba nalor ki masi, ka pisa kaba u don hapoh ïing ruh ki la kylla dpei na ka jingshah bam ha ki thylliej ding nalor ki kot ki sla kiba donkam.
Haba pyrshang ban kylli halor ka daw jong ka jingpluh, u Sunil u la ïathuh ba ha ïing jong u, ki ju pyndonkam ban shet jingshet tang da ka dieng bad u la ong ruh ba ïa mynta um pat lah ban ai jingtip haduh katno ka jinglut na kane ka jingduh bakhraw namarba tang ka dor jong kawei ka masi ruh ka shongdor haduh T.1.20 lak.
Haba ïoh jingtip halor kane ka jingjia, na ka liang ki pulit pynlip ding ki la leit mardor sha katei ka jaka ban tem ïa ka ding ha kaba ki la hap ban pyndonkam haduh 3 tylli ki kali pynlip ding.
