Mairang, Risaw 11
Ha ka Sngi Thohdieng jong ka taïew, ki lai tylli ki shnat treikam jong ka Khasi Students’ Union (KSU) ba kynthup ïa ka Mairang Circle, Nongkhlaw Circle bad ka Mawthadraishan Circle ki la leit ban buh da ka jingujor sha ki pulit ka Mairang pyrshah ïa ki bor synshar District jong ka Eastern West Khasi Hills halor ka jingpynkheiñ ïa ka jingpynbna ba la pynmih ha ka 19 tarik u Nailar, 2024, kaba la pynmih da ki bor synshar District.
Ha ka jingujor kaba la ai da ka KSU sha ki pulit, la ong ba kane ka jingujor ka long halor ka jingpynkheiñ ïa ka jingpynbna ba la pynmih da ka bor synshar District, kaba la buh kyndon bad mana ban pynlong ïa ki jingïakob khwai dohkha, fishing fair/fete bad kiwei kiwei hapoh ka jingjngai kaba 1 km na ka surok bah NH 44-E bad ka bynta jong ka surok bah na Mairang-Ranigodown-Azra da kaba pynpaw ba kane ka la wanrah ïa ka jingkhapngiah kaba jur, ka jingeh ïa ki paidbah bad ka la pynthut ïa ka jingïaid lynti jong ki kali.
Shuh shuh na ka liang ka seng ka la ong ba ha kawei pat ka liang katkum ka jingtip jong ka seng, ïa kum kine ki kam yn pynlong biang ha ka 12 tarik u Risaw, 2024.
Kumta, na ka liang kitei jylli treikam jong ka KSU ki la kyntu ïa ki pulit ban shimkhia ïa kane ka kam jong ka jingpynkheiñ ïa katei ka jingpynbna.
