Shillong, Risaw 13
Ka Raid Marwet ka dei kawei na ki Raid kaba hap hapoh ka jingpeit jingkhmih jong ka Hima Mylliem bad dei ha kane ka Raid kiba bun ki Khasi la die jaka katba mon sha ki briew kiba dei na kiwei pat ki jaitbynriew.
Ki jaka naduh na ka lad jong ka surok ban rung sha University of Science and Technology (USTM), ter ter sha Killing, Nongspung, Pillingkata, Umtyrnga, Chibra, Bahennudi, Pynker, ki la bun da kiwei pat ki jaitbynriew kiba shong ba sah bad long trai syndon ïa ki jaka puta, wat lada ki Khasi ruh ki donlang ha katto-katne ki jaka.
Napdeng kiba bun ki shnong kiba hap ha Raid Marwet, ka shnong Nongspung ka dei kaba la khleh lang bad kiwei pat ki jaitbynriew kiba na Manipur kum na Ukhrul district bad kiwei kiwei ki district.
Haba u nongthoh khubor u ïoh ban ïakren bad kiba bun ki trai Jylla kum ki Garo bad Khasi kiba sah ha kine ki shnong kiba hap ha Raid Marwet, ki la pynpaw ka jingdiaw bad ki jaka jong ki trai muluk la ïoh ban thied da kiwei pat ki jaitbynriew.
“Ka long kaei-kaei ka bym lah mutdur ba ki Khasi kiba dei ki trai jaka ruh ki nud ban die ïa ki jaka sha kiwei pat ki jaitbynriew. Kiwei pat ki jaitbynriew ki la ïoh jaka da ki phew akar bad bigha ha kane ka thaiñ,” la pynpaw katto-katne ki Khasi kiba rep sha kine ki thaiñ.
Ki la ong ba ka long kaba ym sngew lah ban ngeit ba ki Khasi kiba dei ki trai muluk haba ki leit rep kwai ne rep tympew, ki hap ban wai ïa ka bri na kiwei pat ki jaitbynriew.
“Ngim lah shisha ban sngewthuh kumno ki nongsynshar jong ka Raid Marwet ki ai dulir jaka sha kine ki briew ki bym dei ki Khasi, bad kumno ki Khasi ruh ki die ïa ka jaka sha ki bym dei ki trai muluk jong ka Jylla,” la pynpaw uwei u rangbah da ka jinglyngngoh namar wat ka aiñ ban die ban thied jaka kam shah ïa ki Khasi ban die sha ki bym dei ki trai muluk jong ka Meghalaya.
Ha kiba bun ki shnong, ki nongshong shnong ki dei kiba shong khleh bad ki don ruh ki shnong ha kaba kham bun ki dei ki trai muluk ka Jylla kum ki Garo.
Kine ki shnong ki hap ha Jirang konstitwensi bad hapoh ka jingpeit jingkhmih ka Umling C&RD Block jong ka Sorkar Meghalaya, hynrei ha ka liang ka jingsynshar trai ri, kine ki shnong ki hap hapoh ka Hima Mylliem bad hapoh ka Raid Marwet.
Ka jingkylli ka long, balei ka Hima Mylliem ka khapbrip bad kam leh ei ei ïa ka Raid Marwet halor ka jingïoh thied jaka ki bym dei ki trai muluk jong ka Meghalaya ha Raid Marwet.
Dang shen, ka la paw pyrthei ruh ba uwei u briew uba dei u nong Meghalaya, u la ïoh ban thied jaka ha thaiñ Nongspung.
Une u briew u la tih bad pom ïa u lum ha jaka jong u kaba la wanrah jingeh ïa ki nongshong shnong kiba sah kham sha them ha shnong Nongspung B, khamtam ha ka por ba jur slap namarba ka ktieh ka rung sha ïing jong ki briew. Ki don ki longïing ki bym nud shuh ban sah ha ïing bad ki hap leit sah sha ïing ki para marjan ne sha ïing ki bahaïing.
