Shillong, Risaw 13
U Bah Pynïaid Sing Syiem uba dei u MDC ka NPP na Sohryngkham Konstitwensi bad ruh u Chief Executive Member (CEM) ka Khasi Hills Autonomous District Council (KHADC), u la phah shithi ban iehnoh kam kum u President ka NPP Mawryngkneng Konstitwensi, East Khasi Hills District.
Katkum ka khubor ba la ïoh lum na ki nongïalam ka NPP la ïathuh ba u Bah Pynïaid u la phah ïa kane ka shithi iehnohkam sha ki nongkitkam ka NPP Mawryngkneng mynta la artaïew eiei.
Ki khubor ki ïathuh ba ym tang ba u la iehnoh ïa ka kam President hynrei un nym ïakhun shuh ïa ka ilekshon na Sohryngkham Konstitwensi ha kane ka ilekshon MDC namar la sngewthuh ba u lah ban ïakhun noh na Nongthymmai Konstitwensi.
Shuh shuh ki khubor ki la ïathuh ba lashai ka sngi kata ka 14 tarik mynta u Risaw 2024, ki nongkitkam NPP kin sa shong pyrkhat ïa kane ka shithi ban jied noh da uwei bad hadien kata kin sa pyrkhat ban wad kyrtong thymmai ban mih bujli ha jaka jong u Bah Pynïaid Sing Syiem na Sohryngkham Konstitwensi ha kane ka ilekshon MDC.
Kum ban shu pynkynmaw, ha kine ki sngi haba ki nongthoh khubor ki la ïoh ban ïakren bad u Bah Pynïaid, u la ïathuh ba ki la don ki ‘riew rangbah, ki samla bad ki longkmie kiba la wan khot ïa u ban ïakhun noh na ka Nongthymmai Konstitwensi hynrei u hap ban shong jingïalang bad ki nongkitkam ka NPP Mawryngkneng Konstitwensi.
La sngewthuh ba hadien ka jingiehnoh ïa ka kam President NPP na Mawryngkneng, u Bah Pynïaid u la pynkhreh ban ïakhun ïa ka ilekshon MDC na Nongthymmai Konstitwensi kaba hap ha Shillong City.
