Shillong, Risaw 13
U President ka All Meghalaya SSA School Teacher’s Association (AMSSASTA), Bah Peter Thyrniang, u la pynpaw ba shisien ba la mih ha madan ka don beit ka jingktah ïa ki nonghikai haba lajan ka eksam hynrei kin nym kynrandien namar kin ïakhih beit haduh ban da ïoh jubab na ka Sorkar Jylla.
U la ïathuh ba ka jingïakhih ki nonghikai SSA ka la ïaid mynta la khatlai sngi ban dawa pynkiew tulop ïa ki nonghikai haduh mynta ka Sngi U Blei bad lashem taïew kin sa dang pynkhreh sa kiwei pat ki prokram ban pynkhih ïa ka Sorkar Jylla.
U la pynkynmaw ba ha kane ka taïew haba ki leit tur sha Secretariat, u nongaiktien ka Sorkar Jylla u la pyntip ba ki la dep phah da ka jingthoh sha u Myntri Rangbah ka Jylla u Conrad Sangma tangba u khlem pat pdiang bad mynta ki la pynkhreh ban ïoh ban phah biang sa shisien hynrei u dang bun kam sha Rilum Garo ba dang don ka jingshlei um bad dang ïaid ka shuti puja.
“Ka sorkar lada ka mon ka lah beit ban pynkiew tulop ha kano-kano ka por lym kumta ngin shong beit haduh ban da ïoh ïa ka jingdawa,” u la ong.
Haba kylli kan don ne em ka jingktah ïa ki khynnah skul haba dang bteng ka jingïakhih, u Bah Peter u la pyntip ba kan don beit hynrei mynta u bnai kiba bun ki nonghikai ki la pyndep lut ïa ki sobjek ba ki ju shim ha skul.
