Shillong, Risaw 13
Ka sor Shillong bad ka jylla Meghalaya mynta ka sngi ka la duh noh ïa uwei na ki khlur uba la long u nonghikai uba pawnam. U Brother Eric Steve D’Souza, dkhot jong ka jingïasyllok Christian Brothers kiba pynïaid ïa ka St Edmund’s School bad St Edmund’s College, Shillong bad kiwei ki skul ha Ri India bad ha ki bynta bapher-bapher jong ka pyrthei, u la khlad noh ha ka Sngi U Blei ha Goa hadien ka jingshitom kaba la ban ïa u la katto-katne snem.
U Brother D’Souza u la don ha Shillong la bun snem ha kaba u la hikai ïa ki khynnah ha St Edmund’s School bad u la seng ruh ïa ka skul Providence ban ai jinghikai ïa ki khynnah kiba wan na ki longïing-longsem ba kham duna ka ïoh ka kot.
Haba pyntip ïa kane ka khubor, u Brother Solomon Morris, Principal ka St. Edmund’s School, Shillong, u la ong ba u Br. D’Souza u la khlad noh ha ka step Sngi U Blei ha Regina Mundi, Goa. U la ong ba ïa ka met kaba sah jong une u nonghikai bad u riewniam, yn wanrah sha Shillong ha ka Sngi Ba-Ar bad ka jingleit ontep kan long ha ka Sngi Balang. Hynrei ïa ki jingtip kiba bniah yn sa pyntip kham hadien.
Lah ban kdew ba u Brother D’Souza u la long ruh u nonghikai jong u khlur ak phlim ka Bollywood, u Shah Rukh Khan, ha St. Columba’s New Delhi.
