Resubelpara, Risaw 13
Palat 80 ngut ki briew, kynthup ïa ki kynthei bad ki khynnah, ki la kem pang kynsan hadien ba ki la bam ïa u shana khleh (ba suba bym long shuh), ïa uba la tip kum ka ‘Chana Mix’, ha ka shnong Adokgre, North Garo Hills.
Katkum ka jingïathuh ki ophisar distrik ka North Garo Hills, la pynlong ïa ka jingïalehkai phutbol ha Madan Chenangre, Adokgre ha ka 9 tarik u Risaw.
Ha katei ka sngi, da ki spah ngut ki nongpeitkai kiba don ha katei ka jaka ïalehkai phutbol ki la bam ïa u shana khleh na uwei u nongdie bad hadien katto-katne kynta, ki la sdang ban lynga-pisa bad suh kpoh.
Ïa kine ki briew kiba kem pang, la pynkit noh mar-mar sha Adokgre PHC, hynrei namar ka jingshitom jur jong ki katto-katne ngut, 6 ngut na ki, ki la donkam ban shah sumar shuh-shuh bad kumta la pynkynriah noh ïa ki sha ki jaka sumar ha Guwahati bad Goalpara.
Na ka liang u Deputy Commissioner bad Superintendent of Police ki la leit jngoh ïa ki nongpang ha Adokgre PHC bad kyntu ïa ki paidbah ban long kiba jai-jai bad ban pyntip lada don kino-kino kiba mad ïa kum kine ki dak ki shin na bynta ban ïoh ïa ka jingïarap kaba kloi.
Ki jingpynbna ba dang shen na ka tnad ka koit ka khiah ki kdew ba baroh ki briew kiba shah ktah na katei ka jingjia mynta ki la lait na ka jingma.
Ïa kine ki marbam la kurup noh da u Food Safety Officer ka North Garo Hills bad ïa ki nongmuna jong ki jingbam (ba la bam) la phah sha Shillong na bynta ka jingpeit bniah (Laboratory Analysis).
Na ka liang ki bor pynïaid distrik ka North Garo Hills ki la pynlong ïa ka jingtohkit halor katei ka jingjia.
