Shillong, Risaw 13
Ka jingkyrshan ki paidbah bad ka Sorkar Jylla ka la pynlong ïa u Steve Jyrwa u samla Khasi na Shillong ba un shah jied ban ïoh rung sha ka semi final ha ka India’s Best Dancer Season-4.
Haba ïakren bad ka kmie jong u Steve Jyrwa ka Kong Bibi Jyrwa ka la ïathuh ba ka la ïoh jingtip na Mumbai ba u Steve u la shah jied sha ka semi final ryngkat kiwei hynriew ngut kiba don ha ka jingïakhun.
“Nga ai khublei ïa ki paidbah ka jylla kiba la kyrshan bad ïa ka Sorkar Jylla kiba la kyrshan ïa u khun jong nga uba la poi sha ka semi final,” ka la ong.
Ka la ïathuh ba u Steve u dang don mynta ha Mumbai bad u hap ban ïakhun tyngeh ban poi sha ka final ka ban long ha ka 24 tarik mynta u bnai Risaw ha Mumbai.
Shuh shuh ka la kyrpad ïa ki paidbah bad ïa ka Sorkar Jylla hapoh ka jingïalam u Myntri Rangbah ka jylla u Conrad K Sangma ba kin dang kyrshan haduh ba un da rah ïa ka final.
