Shillong, Risaw 13
Ka kynhun jong ka Chi Ïung Multi Purpose Society ha ka Sngi Saitjaiñ ka 12 tarik u Risaw 2024, ka la wan shakhmat ban pynshai paidbah ha Shillong Press Club halor ka jingthmu ban pynkhalai biang ïa ka nusib ne ka ‘Lucky Draw’ jong ka khusnam kaba nyngkong kaba dei da ka Trok Dumper hadien ba ka la don ka jingpyrshang ban leh thok da ar ngut ki khynnah samla.
Ha kane ka jingleh tuh jong kine ar ngut ki khynnah, la ïohi ha ka dur-khih ba la ring da ka kynhun Chi Ïung ha katei ka por ba uwei napdeng kine ki khynnah u la wan shakhmat ban jied ïa kawei ka tiket na ka bynta ka khusnam banyngkong ba la pynlong ha ka 28 tarik u Nailur 2024 da kaba u la buh ïa ka tiket jong u ha ki sla kjat bad ynda la dei ka por ban jied ïa ki tiket, utei u khynnah u la dem ka khlieh shapoh bad shim ïa ka tiket na ki sla kjat.
Haba kren sha ki nongthoh khubor ha ka Sngi Saitjaiñ, ki nongïalam ba hakhmat ka kynhun lyngba u President jong ka, u Bah Kynpham Lamurong ki la pyntip ba ki la dep ban pan jingbit na ki bor pynïaid distrik ban pynlong biang ïa ka jingkhalai nusib kaba dei tang na ka bynta ka khusnam kaba nyngkong. Hynrei namar ba u Deputy Commissioner jong ka West Jaiñtia Hills District u dang don hapdeng ka jingshim shuti, kumta na ka liang ka kynhun kam pat ïoh ïa kano-kano ka jubab ne ka jingbit ban buh ïa ka tarik bad ka sngi ban pynkhalai nusib biang.
Na ka liang ka kynhun Chi Ïung kan ap haduh ban da ïoh jingbit na ki bor distrik khnang ba yn lah ban pynkhalai biang ïa ka khusnam banyngkong.
Ha kaba ïadei bad kiwei pat ki khusnam, na ka liang ki briew kiba donbok kiba dei ïa ki tiket nombar jong ki, ki lah wan kam ïa ki khusnam jong ki bad shim syndon ïa ki khusnam ha ryngkat ka jingsakhi lang jong ki dkhot kane ka kynhun.
U Bah Kynpham u la ïathuh ruh ba ka daw kaba pynlong ïa ka Chi Ïung Multi Purpose Society ban slem ha ka ban pynkhalai biang ïa kane ka khusnam banyngkong na ka bynta ka trok dumper ka long kum shibynta ban dawa na ki ar ngut ki samla kiba la leh tuh ha kaba ïadei bad ka jingjied ïa ki tiket khalai nusib ba kin wan shakhmat ban pynshai paidbah.
Halor kane ka jingjia, ka kynhun ka la dep ruh ban mudui da ka ejahar pyrshah ïa kine ar ngut khynnah samla ha thanat jong ka Phramer.
“Ynda ngi la bishar bniah, ngi suba ba ka don ka jingleh tuh, kumta ngi leit sha ki pulit ban tohkit bad wad ïa ki jingshisha bad lyngba ka jingtrei shitom jong ka thanat Phramer, ngi la lap ïa ka jingshisha ba ka dei shisha ba uto u khynnah u la leh tuh ha kaba u la phla ba u buh ïa ka tiket ha ka sla kjat jong u”, ong u Bah Kynpham.
U Bah Kynpham u la ong ba kane ka jingjia ka la pynjah burom shi kat dei eh ïa ka kynhun baroh kawei namar ki la mih shibun ki jingkynnoh bad jingkynthoh pyrshah ïa ka kynhun kaba la ktah ruh wat ïa ka kam-ka jam jong ki hynrei da ka jinglap ïa ki jingshisha, ka la wanrah ka jingkmen ïa ka kynhun.
