Shillong, Risaw 13
U Myntri Rangbah ka Jylla, u Conrad K. Sangma, ha ka Sngi U Blei, u la pynpaw ka jingsngewlem halor ka jingkhlad noh u nonghikai ba paw, u Brother Eric Steve D’Souza, dkhot ka jingïasyllok Christian Brothers, uba la pynlut por bun snem ha nongbah ban hikai ha St. Edmund’s School, Shillong.
Ha ka jingthoh ha ka rynsan lad pathai ‘X’, u Myntri Rangbah u la ong, “Da ka jingsngewsih kthang, nga la ïoh jingtip halor ka jingkhlad noh jong u Brother Eric Steve D’Souza, u nonghikai ba kyrpang, uba paw na bynta ka jingaiti lut jong u ha ka pule-puthi bad ka jingsngewrit. Kum u dkhot ba donburom jong ka jingïasyllok Christian Brothers, u Brother D’Souza u la pynlut bun snem ban shakri ha St. Edmund’s School, Shillong bad ieh noh ïa ka pateng ka bym lah ban pyndam.”
“Kum u Christian Brother uba aiti lut, ka mynsiem jinglong kloi jong u ka la ïalam sha ka jingseng ïa ka skul Providence, ka sharak jingkyrmen ïa ki khynnah kiba duna ka ïoh ka kot. To ai ba ka pateng kaba ai mynsiem jong u Brother D’Souza kan wanrah ka jingpyntngen ïa ka ïing ka sem jong u, ïa ka jingïasyllok Christian Brothers, bad ïa ki jingim bym lah ñiew kiba u la pynkylla lyngba ka jinghikai bad ka jingsngewrit jong u. To ai ba ka mynsiem jong u kan ïoh ïa ka jingjah thait ka bymjukut.”
Kum ban shu kdew hangne, u Myntri Rangbah ka Jylla u la pule ha St. Edmund’s School, Shillong ha shuwa ban kynriah sha St. Columba’s School, New Delhi. U Brother D’Souza u la long ruh uwei napdeng ki nonghikai jong u Myntri Rangbah ha St. Edmund’s School, Shillong.
Ïa ka jingpyntip halor ka jingkhlad noh jong u Brother D’Souza la pynbna da u Brother Solomon Morris, Principal ba mynta ka St. Edmund’s School, Shillong ha ka Sngi U Blei.
Katkum ka jingïathuh u Brother Morris, u Brother D’Souza u la khlad noh mynta ka step ha Regina Mundi, Goa. Ka jingkhlad noh jong u ka long hadien ka jingpang kaba la neh la slem mynta.
U Brother Morris u la pyntip ruh ba ïa ka met jong u Brother D’Souza yn sa wanrah sha Shillong ban tep. Ka met ka lah ban poi ha ka Sngi Ba-ar, bad ka jingleit ontep kan long ha ka Sngi Balang. Hynrei u Brother Morris u la ong ba ïa ki jingtip ba bniah yn sa ïasam hadien.
