Shillong, Risaw 14
Ka All Khasi Meghalaya Tourist Taxi Association (AKMTTA) ka la pynbna ha ka Lah Sngi U Blei ba kan ym leit sha ka jingïalang kaba la khot da ka Committee jong ka tnat jngohkai na ka bynta ban ïakren halor ki mat kiba ïadei bad ka kam jngohkai kynthup halor ka jingdawa ban pyrkhing ïa ki kali kiba nabar Jylla ban kit ïa ki nongjngohkai shaduh ki jaka jngohkai bapher-bapher.
Kum ban pynkynmaw, ka tnat jngohkai pyrthei ka Sorkar Jylla ka la thaw ïa kawei ka Committee kaba khlieh da u Director u Bah Cyril VD Diengdoh na ka bynta ban shim ïa ki jingai jingmut haba ïadei bad ka kam jngohkai.
Haba kren sha ki lad pathai khubor, u Presi-dent ka AKMTTA, u Bah Ricaldinus Dohling u la ong ba ka daw kaba kongsan ba kim treh ban leit sha kane ka jingïa-lang kaba la khot da u Director ka tnat jngohkai ka dei namarba ka Committee ka la khot lang ïa baroh ki kynhun kiba donbynta ha ka kam jngohkai pyrthei (tourism stakeholders).
U la ong ba ha ka jingshisha, ka dei lyngba ka jingïakhih bad jingdawa ka AKMTTA kaba la phah jingthoh ruh sha u Myntri Rangbah ka Jylla u Conrad K Sangma ha ka 19 tarik Nailur, 2024 bad na ka liang u Myntri Rangbah u la phah thaw ïa ka Committee ka ban khlieh da u Director ka tnat jngohkai ban shim ïa ki jingai jingmut.
Kumta ka Committee ka la khot ïa ka jingïalang ha ka Sngi Ba-ar (15 tarik Risaw, 2024) ha State Convention Centre.
U Bah Dohling u la ong ba ki tour operator, ki hotel bad guest house, kim dei kiba don ha surok hynrei ki nongñiah tourist taksi ki don beit ha surok bad ka Sorkar ka dei ban khot shwa tang ïa ka kynhun ki nongñiah kali tourist ban ïakren ïa ki jingeh.
Kumta u la ong namar ba ka Committee kaba khlieh da u Director ka tnat jngohkai ka la khot lang ïa kiwei pat ki kynhun, ka AKMTTA ka la rai ban ym leit sha ka jingïalang ha kaba la phah ruh da ka shithi sha u Director ka tnat jngohkai.
Haba kylli halor ka jingong u Myntri ka tnat jngohkai u Bah Paul Lyngdoh ba ka Jylla ka dang duna ki kali kumba lai hajar tylli ban kit ïa ki nongjngohkai pyrthei, u Bah Dohling u la ong ba u Myntri ka tnat jngohkai ka Jylla u ïohi tang kita ki jingduna hynrei um tip pat ba ki don da ki hajar tylli ki kali kiba khlem ïoh kamai.
Haba kylli, balei ka seng ki nongñiah tourist taksi ka khlem dawa naduh ki snem kiba mynshwa, u Bah Dohling u la ong kum kane ka mat jingdawa ka la don naduh 10 ne 15 snem mynshwa, tangba ka Sorkar mynshwa ruh kam shym la shim khia ïa kane.
U la ong ba kum kane ka jingdawa ka la don ha kaba u la don uwei u ‘riewrangbah uba la phah da ka jingthoh sha ka Sorkar ha ki snem kiba mynshwa bad hadien ba u la ïohi ba ka AKMTTA ka la mih ban dawa ma u ruh u la phah ïa kata ka jingthoh kaba u la dep phah sha ka Sorkar ha ki phew snem kiba la leit.
Shuh shuh haba kylli halor ka jingshim kabu ki nongñiah tourist taksi ïa ka bai kali, u Bah Dohling u la kynnoh pynban ba ka dei ka Sorkar kaba pynkulmar ïa ki nongñiah. U la kubur ba ki don ki nongñiah kali kiba shim bai kali ha la kajong kajong ka dor, bad ki don kiba shim bai kali 3000, 3500, ne 4000 tyngka. Hynrei u la ong ba ki nongleit jingleit ruh ki sngewthuh ïa ka jingeh jong ki nongñiah kali hadien ba la batai bad pynsngewthuh ïa ki.
U la ong ba lada dei ba ka Sorkar ka bym lah ban khot ban pynbeit ïa ki mat jingdawa bad lada ka Sorkar ka kloi ban shna ka policy, na ka liang ki nongñiah kali ki kloi ban pynbeit lang.
Kumta u la ong ba ka AKMTTA kan sa leit sha ka jingïalang kaba khot da ka Committee tang lada ka khot ïa ka AKMTTA ban ïakren ïa ki mat jingdawa kiba la dep pynsngew sha ka Sorkar baroh shikatta.
