Khliehriat, Risaw 14
Kawei ka longïing ka la mad ïa ka jingduh kaba khraw hadien ba ka ïing kaba ki shong ki sah ka la shah bam duh ha ki thylliej ding. Kane ka la jia ha ka shnong Deinshalalu ha East Jaiñtia Hills District.
Ïa kane ka ïing la dei trai da ka Kong Porpynsuk Dkhar bad u Ma Marjan Phawa.
Haba ïakren bad u Waheh Shnong barim u Ma Mewan Dkhar, u la ïathuh ba kane ka jingjia ka la jia ha ka 13 tarik Risaw ha ka nohphai sngi kata ha ka por kumba 2 duna eiei.
U la ïathuh ba ïa ka daw jong ka jingpluh ym pat lah ban tip bad u la ïathuh ruh ba ha kane ka jingjia ym don kano- kano ka jingjia kaba sngewsih, hynrei baroh ki jingdon jingem jong kane ka ïing ki la kylla dpei lut.
Shuh shuh u la ïathuh ruh ba na ka liang ka shnong ka la dep ban pyntip sha ki bor jong ka aiñ ban leh ïa kaba donkam.
