Shillong, Risaw 14
Ka Khasi Students’ Union (KSU) lyngba ka Employment Monito-ring Cell ha ka Lah Sngi U Blei ka la pan jingshai na ka Sorkar halor ka jingsynñiang jong 6 ngut ki briew kiba la shah kyntiew sha ka kyrdan Meghalaya Civil Service (MCS).
“Ka jingwan jong ngi kam dei ba ngi wan tuklar ne bishni ïa kine ki 6 ngut, hynrei ngi shu kwah tip ba ha kano ka rukom kine ki 6 ngut ki shah pynkiew kyrdan,” ong u Chairman ka Employ-ment Moni-toring Cell ka KSU, samla Reuben Najiar hadien ka jingïakynduh bad u Secretary ka tnad Personnel & A.R., ka Sorkar Jylla, Bah C.V.D. Diengdoh haba ïadei bad ka jingpynbna kaba la pynmih da ka tnad halor ki 6 ngut ki kyrtong kiba la shah kyntiew kyrdan ban long noh kum ki ophisar MCS.
U samla Najiar u la ong ba u Secretary u la pynshai ba ka don ka jingpynbna kaba la pynmih na bynta kiba trei Sorkar ba ki lah ban thep bad hadien kane, yn bud sa ka ‘Interview’.
“Haba phi lah ban kyntiew kyrdan ïa kat kiba wan khlem kano-kano ka jingjied ne jingpynshai paidbah, ngi shu kwah kylli kaei ka jingsynñiang kaba kine baroh ki la ai. Mynta ngi ïohi ba ki don ki briew kiba shah kyntiew kyrdan MCS kiba dei na ka tnad pulit…u dei tang u SI. Ka don jingïadei aïu kata ka jinglong SI bad ka jingkyntiew kyrdan MCS,” u la ong.
“Haba dei u SI, u lah ban kiew kyrdan ha ka tnad pulit, hynrei kumno ban shu wanrah na kawei ka tnad sha ka MCS,” la buh jingkylli u samla Najiar.
Ha kawei ka liang, u la ong ba lada long ha kane ka rukom, kata kam myntoi ïa ki samla ban pynlut por ha ka ban pule, ban pynkhreh ïa ka eksamin MCS, hynrei ka bha ba nai pynlong eksamin (MCS), bad ban shu kyntiew kyrdan lut ïa baroh.
Haba kdew ba ki aiñ jong ka Jylla ki dei kiba la rim, kata naduh u snem 1975 bad ki bym lah treikam shuh ha ka juk mynta, u Chairman u la buh jingkylli, “Hato kane ka jingkyntiew kyrdan ka long da kaba khuid ba suba ne dei tang ba ki don jingïadei bad katto-katne ba ki kiew kyrdan.”
“Ngi kwah jingpynshai da ka jingthoh kaei ka jingsynñiang na kine ki 6 ngut ba ki kiew kyrdan bad ngin sa peit ïa ka sienjam ba ngi dei ban shim,” u la ong.
Nalor kane, ka seng ka la ïakren ruh bad u Secretary halor ka jingpynbna kaba la mih ha ka tnad Lariti (Arts & Culture) haba ïadei bad kawei ka kam nonghikai tem ‘Guitar’ (Guitar Instructor) kaba la leit sha u Garo, kaba katkum ka jingtip jong ka seng, kane ka kam ha ka jingshisha ka dei ban leit sha u Khasi-Jaiñtia namar ka la sah thylli hadien ka jingshongthait noh jong uwei u Khasi.
“Ynda ngi la wad, ngi lap ba kine baroh ki dei namar ka jingthurmur ha ka rukom pyntreikam ïa ka ‘Roster’ na ka liang ka tnad treikam. Kumba ngi la ai jingmut ha ki por ba la leit ïa ka Sorkar ba ka ‘Roster’ ka dei ban ïaid nange shakhmat…ba kaei kaba la pynrung ha ka ‘Roster’ kan kut noh ha u snem 2022 bad nangne shakhmat yn sdang thymmai noh khnang ba kan ym don kano-kano ka jingktah,” u la ong.
Wat la ka Sorkar ka la mynjur ïa ka jingai jingmut ka seng, hynrei kaei kaba ka leh mynta, ïa kaei kaba la dep naduh mynshem snem, ka dang rah sha ki snem ba wan, u la ong.
U samla Najiar u la ïathuh ruh ba u Secretary u khlem lah ban ai jingkular halor kane ka bynta bad ong ba kane ka dei ha ka kyrdan u Myntri Rangbah namar da pynkynriah ïa kawei, hap pynkynriah lang ïa baroh.
“Na ka liang jong ngi, ngi kren da kaba shai ba kane ka dei ka jingbakla na ka liang jong phi kumno phi pyntreikam ïa kane naduh kaba sdang bad kumta ka Sorkar kan hap shim ka jingkitkhlieh,” la ong u Chairman.
Halor ka mat ba ïadei bad ka jingthung kam ha Directorate of Forensic Science, ka seng ka la ong ba u Secretary un sa thoh sha ka Director ka tnad ban peit bniah halor kane khnang ba ki samla pule ba la pyndep ïa ka ‘Science’ ki lah ban thep kam ha ka tnad.
