Nongpoh, Risaw 14
Ha ka jingïakhun pyrshah ïa u drok, ki pulit jong ka Special Task Force ka nongbah Guwahati ha ka step phyrngab jong ka Lah Sngi U Blei, ki la ïoh ban kurup ïa u drok Heroin uba shongdor haduh T.4 klur tam na kawei ka trok mar pyrshah bad ka North East Cancer Hospital and Research Institute (NECHARI) ha ki thaiñ Jorabat.
Katkum ka tyllong khubor ba la ïoh lum, la ïathuh ba ki pulit STF ka nongbah Guwahati hadien ka jingïoh jingtip kaba thikna, ki la pynlong ïa ka jingpynapshrip mar pyrshah bad katei ka NECHARI ha kaba ki la ïoh ban bat noh ïa kawei ka trok kaba don ïa u registration number AS01-RC-2336.
Ha ka jingtalasi ïa katei ka trok, ki pulit ki la ïoh ban kurup haduh 45 tylli ki song sabon ba la thep bha ïa utei u drok Heroin uba don ïa ka jingkhia kumba 537.2 gram ïa uba la wanrah na ka jylla Nagaland ban pynpoi sha nongbah Guwahati.
Halor kane ka jingjia, ki pulit ki la kem noh ïa u Rananjay Mandal, 46 snem ka rta, na ka shnong Bamunkuchi jong ka Barpeta District ka jylla Assam bad uba la sah mynta shipor ha Bengali Basti kaba hap hapoh ka jingkhmih jong ka thanat Basistha ka nongbah Guwahati. La ïoh jingtip ruh ba utei u Rananjay Mandal u dei uwei na ki nongshalan drok ba shyrkhei bad uba dei ruh ha kajuh ka por u nongñiah jong katei ka trok.
