Shillong, Risaw 14
U Member Secretary ka Meghalaya State Pollution Control Board (MSPCB), u Dr. GH Chyrmang, MFS, u la ong ba ka jingpynsngewthuh paidbah ne ka ‘Public Hearing’ kaba thmu ban pynlong da ka Meghatop Cement Pvt Limited ha ka 18 tarik u Risaw 2024 na ka bynta ban tei ïa ka karkhana pynmih dewbilat (Integrated Cement Plant of capacity 3.3 MTPA Clinker, 2.8 MTPA Cement bad 16MW Waste Heat Recovery System) hapoh ka shnong Wahiajer Narpuh, East Jaiñtia Hills District, kan ïaid beit shakhmat wat hapdeng ki jingpyrshah na ki kynhun seng bapher-bapher.
Haba kren sha ki lad pathai khubor hadien ka jingwan ïakynduh jong ka Federation of Khasi Jaiñtia & Garo People (FKJGP) East Jaiñtia Hills District ha ka 14 tarik u Risaw 2024 bad aiti da ka dorkhas ban pyrshah jur ïa kane ka jingthmu ban pynlong ïa ka pynsngewthuh paidbah da katei ka karkhana shna dewbilat ha ka 18 tarik mynta u bnai, u Bah Chyrmang u la ong ba na ka liang ka seng ka la pan jingpynshai na u halor katei ka bynta bad na ka liang ka jong u ruh u la dep ban ai ïa ka jingpynshai sha ka seng.
U Bah Chyrmang u la ong, na ka liang ka karkhana Meghatop ka la dep ban aplai bad leh ïa ki kot ki sla kiba donkam kum ka Environment Clearance hapoh ka tnat kaba dei khmih jong ka Ministry of Environment and Forests (MoEF) bad kum ka MSPCB kam don bynta eiei satia ha kane ka kam hynrei ka kamram jong ka MSPCB bad ka ophis jong ka Deputy Commissioner ka EJH, ka dei tang ban pynïaid ïa kane ka ‘Public Hearing’ shakhmat ban khmih la ki don kiba kyrshan ban tei ïa kane ka karkhana hapoh ka thaiñ ne ki bun ki ban pyrshah ïa ka.
“Ngim don bynta eiei ha ka ban pynksan ne ban pynduh jingkyrmen ïa ki nongaplai hynrei ka kamram jong ka ophis jong ngi bad jong ka Deputy Commissioner, ka dei ban pynïaid ïa ka ‘Public hearing’. Kiei-kiei kiba ai da ka jingthoh, ngi hap ban buh bad kiei-kiei kiba da ka jingkren, ngin hap ban rekord bad kaei-kaei kaba ïaid ha kato ka por, ngi dei ban ring dur bad ynda ngi la dep ring dur, ngin hap ban lum bad pynphai shapoh ka MoEF”, bynrap u Bah Chyrmang.
Shuh-shuh u Bah Chyrmang u la ong ba kane ka kam ban ailad ban tei ïa kane ka karkhana kam dei kaba ïaid tang shibynta hynrei ka dei ka kam ka ban ïaid lyngba kiba bun ki bynta.
U Bah Chyrmang u la kren shai kdar ruh ba ka rai ba khadduh ban ailad ne bym ailad ïa katei ka karkhana ban tei hapoh katei ka thaiñ ka shong ha ki kti jong ka Ministry of Environment and Forests (MoEF).
