Mawkyrwat, Risaw 15
Ka jinghiar dor ki mar rep mariang katba nang mih ki sngi ka la long shaba palat khamtam kiba rep ïa u synsar, ‘latyrpad, kwai, tympew bad kiwei kiwei. Kane ka la ktah haduh katta katta ïa ka ïoh ka kot jong ki nongrep na ka bynta ban pyndap ïa ka ïing ka sem bad ban phah skul ïa ki khun ki kti.
Kum ban shu kdew u synsar uba ka Sorkar Jylla ka la ithuh kum u mar rep khlaw uba ka dor jong u ha ki snem ba la dep ka poi haduh T.130 shi kilo hynrei mynta ka dor u synsar ka long tang T.30 tyngka shi kilo, u kwai uba poi T.1200 shi kani mynta u poi sa tang T.150 haduh T.200 shi kani, u Sohmrit na ka T.700 haduh T.800 mynta sa tang T.500 shi kilo kumjuh ruh u sla tyrpad ha kaba ka jinghiar dor kine ki mar rep ka la long shaba palat bad kam kot tang mar shiliang ruh.
Ha kaba ïadei bad kane ka jinghiar dor ki mar-rep, ki paid nongrep jong ka Manad San Shnong Area kiba kynthup ïa ka shnong Manad, Mawbidong, Pynden Lyngdoh, Lummawbah bad Pynden Sohlang kiba ki paidbah nongshong shnong shispah na ka shispah ki dei ki nongrep ki la pynpaw ïa ka jingsngewdiaw kaba khraw ha kaba ïadei bad kane ka jinghiar dor ki mar-rep mar-riang katba ka ki marbam mardih kiba wan na kiwei ki jaka kum u khaw, shini, phan, piat ki la nangkiew dor man ka sngi.
U Bah Redy Shylla u Chairman ka Synjuk Rangbah San Shnong Manad Area haba kren bad ki lad pathai khubor u la ïathuh ba ki nongrep jong kane ka dong ka thaiñ ki don mynta hapdeng ka jingkyrduh kaba khraw namar ki marrep jong ki, kim ïaid dor shuh. Bun ki nongrep ïa u synsar bad u sla-tyrpad uba ki la kheit kim treh shuh ban die bad u la shu pyut kai ha ki jaka buh namar ka jingtad dor shaba palat ha kaba tang ka bai bylla bad bai kit ruh kam mih shuh.
U la pynpaw ruh ba lada kan dang ïai long kumne ha kaba ki marrep jong ki, kin dang ïai hiar dor na ka por sha ka por katba ki marbam mardih kin dang kiew man ka sngi, khlem pep ha kawei ka sngi ki paidbah nongrep kin sa don hapdeng ka jing?ap thngan.
Kumta na ka liang ki paid nongrep jong kane ka dong ka thaiñ ki kyrpad jur ïa ka Sorkar kumjuh ruh ïa ka Myntri ba dei peit ïa ka rep ka riang ba kin leh eiei bad thaw lad thaw lynti ha kaba ïadei bad kane ka jingeh ki nongrep, khnang ba kam rep kam riang kan nang kiew nangne shakhmat ym ba kan duh noh.
