Shillong, Risaw 15
Ka Meghalaya SSA School Association (MSSASA) ka la pynpaw ïa ka jingkyrmen halor ka jingïalong kawei jong baroh ki nonghikai skul SSA hapoh ka Jylla.
“Ngim pat shong jingïalang namar ngi dang ap lang ïa ki paralok Garo jong ngi naba don ki dkhot kiba shah ktah ha kane ka jingshlei um ba la dep,” ong u President ka MSSASA, Bah Aristotle Rymbai.
Haba kylli, u la ong ha ka jingïakynduh bad ki nongïalam ka All Meghalaya SSA School Teachers Association (kiba dang pynlong ïa ka jingïakhih ha Madan Malki) ha kane ka taïew ba la dep, ki ruh ki la pynpaw ïa ka jingthrang ban ïatreilang wat la ki hap ban shong shuwa bad ki para dkhot ban ïakren halor kane ka bynta.
“Mano bym kwah ïatreilang, ka MSSASA ruh ka kwah ban don lang hajuh. Mynta ka shong pat sa ha ki wat la ka don ka dak jingkyrmen,” u la ong.
Haba kren halor ka jingbuddien jong ka seng ïa ki jingdawa ki nonghikai SSA, u Bah Rymbai u la ong ba katkum ka jingpyntip na ki ophisar ka tnad pule-puthi halor ki 2 tylli ki mat jingdawa (jingpynkiew tulop bad jingpynskhem kam), la buh hakhmat ban pynkhreh ïa ka ‘Cabinet Memorandum’ ban wanrah ïa ka mat treikam kumno ban kdup lang noh ïa ki nonghikai SSA na ka State Implementation Society sha ka tnad pule-puthi ka Jylla.
U la pynkynmaw ruh ba ha ka jingïakynduh bad u nongaibuit ka tnad pule-puthi, Bah H.M. Shangpliang, u la pyntip ba ka tnad pule-puthi ka la bsut ïa kawei ka bynta, kata ban ai jingmut sha ka Sorkar ban pyntreikam noh ïa ka rukom siew tulop sha ki nonghikai SSA kumba la pruid dak ha ka Section 23, Sub-Section 3 jong ka RTE Act, 2009.
Na ka liang u Bah Rymbai u la pynkynmaw ruh ba ha ka jingïalang bah jong ka seng kaba la long ha ka 2 tarik Risaw, la rai ban ïatreilang bad ka Sorkar ha ka ban wanrah ïa ka mat treikam ban pynskhem kam ïa ki nonghikai SSA da kaba buh jingmut ba ïa ki jingai jingmut jong ka seng sha ka Sorkar ban pyntreikam ïa ka rukom siew tulop – ka tnad pule-puthi ka la phah ïa ka jingtyrwa haba ïadei bad ki jingai jingmut sha ka Sorkar bad ban pyntreikam ïa kane.
“Katkum ka shithi na ka tnad pule-puthi ka Sorkar India ha ka 6 tarik Nailar, 2021 ba la phah sha baroh ki Jylla, la pyntip ba ka ‘Cabinet Committee on Economic Affairs’ jong ka Sorkar India, ka la ai jingmynjur ban bteng ïa ka skhim SSA sa na bynta 5 snem ban wan – naduh 1 tarik Ïaïong, 2021 haduh 31 tarik Lber, 2026,” u la ong.
Halor katei, u la ong ba baroh ki Jylla ka Thaiñ Shatei Lam Mihngi ki la dep thaw ïa ka mat treikam ban kdup lang noh ïa ki nonghikai SSA.
Na ka liang u President u la kdew ruh ba ha ka jingïalang bah kaba la long ha ka 2 tarik Risaw la rai ban ai por 2 bnai ïa ka Sorkar ban shimkhia haba ïadei bad katei ka bynta.
