Shillong, Risaw 15
Ka Hynñiewtrep Integrated Territorial Organisation (HITO) ka pynpaw ïa ka jingsngewkmen kaba khraw ban ïoh jingtip ba u Vice-President ka Ri India, u Jagdeep Dhankar un wan ban ïuhkjat hapoh ka nongbah Shillong bad ruh ha ki bynta jong ka thaiñ Sohra ha ka 16 bad 17 tarik u Risaw 2024. Kumta na ka liang ka seng ka la pynkhreh ruh da ki dur-ki dar kiba pyni ïa ka jinglong-jingman ba shalyndet jong ka jylla Meghalaya khnang ba utei u Vice-President ka Ri un ïohi ym tang ïa ka dur ba itynnad najrong jong ka Jylla Meghalaya hynrei un ïohi ruh wat ïa ki kyndong-kynshrot jong ka jingsniewdur bad ka jingdkoh ka Jylla.
Ha katei ka dur ba la ai kyrteng ka ‘Explore Meghalaya’ la kdew ïa ka jingbym pat treikam ka skhim sam-um ne ka Jal Jeevan Mission (JJM) wat haduh kine ki sngi ba mynta, ka jingdon ka jingkhaïi dieng beaiñ, ka jingkylla pung dohkha ki surokbah ha ki thaiñ Rilum Jaiñtia, ka jaka jong ki trok kiba kit palat pud ïa ki mar, ka jingjot rathai ki skul ha kylleng ka Jylla, ka jingshalan tuh ïa ki masi nalor kiwei-kiwei.
Shuh-shuh ha katei ka dur la ong ruh ba ka jylla Meghalaya ka dei ka jylla kaba bha tam ha ka ban shna ïing, ka jaka kaba bha tam na ka bynta ki kam beaiñ bad ka jaka kaba ïakynduh baroh ki lad namar ba ka long ka jylla kaba stad tam bad la buh jingkylli ba ka dei ka jaka shong jong ki lyoh lane ka jaka shong jong ka jingbamsap?
Na ka liang ka seng ka la ong ba wat la ka la dap da ka jingsngewkmen ban ïohsngew ïa kane ka khubor ban wan ïuhkjat u Vice-President ka Ri hynrei ka seng ka kwah ruh ba utei u heh duh ka Ri un ïohi ïa ka jinglong-jingman bad ka jingbym don ka roi-ka par hapoh ka jylla jong ngi hynrei kaba dap sa tang ka jingbamsap ha baroh ki liang bad ka pisa kaba la phah da ka Sorkar Pdeng ruh kaba long da ki phew-phew klur tyngka ban wanrah ïa ka roi ka par kam ïahap satia bad ki kam ba la pyntrei da ka Sorkar Jylla.
“Ngi khot sngewbha ruh ïa phi ba phin ïohi ha ka por ba phi wan ban ïuhkjat ïa ka Jylla jong ngi ïa ka jingbym don ka roi-ka par hapoh ka Jylla jong ngi. Phi lah ban peit ïa ki bynta bapher-bapher jong ka jingbamsap kiba don hapoh ka Jylla jong ngi, ka Sorkar Pdeng ka phah pisa da ki phew-phew klur na ka bynta ka roi ka par hapoh ka Jylla jong ngi hynrei haba peit ïa kata ka roi ka par bad ki jingdonkam baroh, ki dang duna bha hynrei ka pisa kaba la phah da ka Sorkar Pdeng bad ka pisa kaba la pynlut kam don jingïahap satia”, ong u Bah Jyrwa.
Na ka liang u General Secretary ka HITO Shillong City, Bah Balajied Jyrwa u la ong ba ka seng ka la ai da ki dur khnang ba utei u heh duh ka sorkar un ïohi ïa ka jingbamsap hapoh jong kane ka Sorkar Jylla bad ban ïohi ba katno ki paidbah ka Jylla ki shem jynjar bha.
“Ngi kwah ba u Vice-President un peit ïa kine ki jaka kiba ngi ai jingmut ba un leit ïuhkjat khnang ba un sngewthuh shai ïa kaei kaba jia hapoh ka Jylla jong ngi”, bynrap u Bah Jyrwa.
