Shillong, Risaw 15
U Chief Electoral Officer (CEO) ka jylla u Dr. B.D.R Tiwari u la pynbna paidbah ba ki kyndon pyrkhing ilekshon lane Model Code Of Conduct (MCC) ki la treikam hadien ba ka Election Commission of India ka la pynbna ban pynlong ïa ka ilekshon MLA shiteng samoi ha Gambegre Konstitwensi ka ban thep ‘vote’ ha ka 13 tarik Naiwieng bad ka jingñiew ‘vote’ kan long ha ka 23 tarik Naiwieng.
Haba kren sha ki lad pathai khubor, u Tiwari u la ïathuh ba ki kyndon pyrkhing ilekshon ki la treikam naduh ba la pynbna ïa ka ilekshon shiteng samoi khamtam ha West Garo Hills district baroh kawei. U la ong ba ka jingpynkhreh ïa ka ilekshon kaba kynthup naduh ka jingdon jong ki nongthep ‘vote’ bad kiwei kiwei ki kam ha Gambegre Konstitwensi ka la ïaid shakhmat na ka bynta ban pynlong ïa ka ilekshon kaba ïaid beit bad kaba khuid kaba suba.
Haba ïakren bad ki nongthoh khubor ha ka Sngi Ba-ar, u Tiwari u la ong ba ka Election Commission of India ka la pynbna ïa ki tarik ban pynlong ïa ka ilekshon MLA shiteng samoi ha Gambegre konstitwensi kaba kynthup ruh ïa ki ilekshon shiteng samoi ha kiwei pat ki konstitwensi kiba don ha kiwei ki Jylla.
Ka jingpynbna kaba pyntip ïa ka jingsdang ban thep kyrteng ki kyrtong kan long ha ka 18 tarik Risaw, bad ka sngi khatduh ban thep kyrteng kan long ha ka 25 tarik Risaw 2024. Ka jingpeit bad bishar bniah ïa ki kot ki sla jong kiba thep kyrteng kan long ha ka 28 tarik Risaw bad ka sngi khatduh ba ki kyrtong kin weng kyrteng kan long ha ka 30 tarik Risaw.
U Tiwari u la pyntip ruh ba ka sngi ban thep ‘vote’ kan long ha ka 13 tarik Naiwieng 2024 bad ka sngi ñiew ‘vote’ kan long ha ka 23 tarik Naiwieng 2024. Ki kam baroh kiba ïadei bad ka ilekshon shiteng samoi dei ban pyndep lut hapoh ka 25 tarik Naiwieng, 2024.
Haba kylli shaphang ka jingpynkhreh ïa ki pulit pahara ban pynneh ïa ka suk ka saiñ namar ka jingdon ka ilekshon, u Tiwari u la pyntip ba ka jylla ka la dep pynkhreh lypa ïa ki lad jingïada na ka bynta ban pynlong ïa ka ilekshon kaba ïaid beit ïaid ryntih bad kaba khuid-suba lyngba ka jingbuh ïa ki pulit pahara katkum ka jingdonkam.
Kum ban pynkynmaw, ka Election Commission of India ka hap ban pynlong ïa ka ilekshon MLA shiteng samoi ha Gambegre konstitwensi hadien ba u nongïalam ka Congress, u Saleng A Sangma u la iehnoh ïa ka kam kum u MLA ka Gambegre konstitwensi namar ba une u nongïalam ka Congress u la shahjied noh kum u MP ka Lok Sabha na Tura konstitwensi ha u Jylliew mynta u snem 2024.
Napdeng ki seng saiñ pyrthei ki ban ïakhun ha ka ilekshon MLA shiteng samoi, ka National People’s Party (NPP) ka la dep pynbna ïa ka kyrtong da ka Mehtab Chandee A Sangma kaba dei ka kurim jong u Myntri Rangbah u Conrad K Sangma bad ka All India Trinamool Congress (AITC) ka la pynbna ïa ka kyrtong da ka MDC ka Sadhiarani Sangma kaba dei ka kurim u MLA barim ka Rangsakona konstitwensi u Zenith Sangma.
Kiwei pat ki seng kum ka Congress bad ka BJP kim pat pynbna kyrtong haduh mynta.
