Shillong, Risaw 15
Ka jingshah thok pisa bad ki kam tuh ka dang bteng na kawei ka por sha kawei pat, wat lada manla ka por na ka liang ki pulit ki ju bthah ïa ki briew ban long kiba husiar bad peitngor.
Katkum ka khubor kaba la ïoh lum na ki pulit la ong ba kawei ka longkmie, kaba dei ka trai jong kawei ka kompeni ha East Jaiñtia Hills ka la ujor pyrshah ïa uwei u briew ba la tip kyrteng u Subrat Kumar Barik, MD jong ka M/s Girod Management & Advisory bad paralok jong u, da kaba kynnoh ba ki la thok bad shukor pisa haduh T.2 klur.
Ha kane ka jingujor kane ka longkmie, ka la kynnoh ba u Subrat Kumar bad u paralok jong u, ki la thok pisa haduh T.2 klur na u kurim jong ka bad na uwei uba ïa treikam lang bad u kurim jong ka, ïa katei ka pisa ha kaba ïadei bad kawei ka ‘investment deal’ kaba la leh ha ka 30 tarik mynshem bnai bad 1 tarik Risaw, 2024.
Ha kawei pat ka khubor, ka Sanjana Devi ka la ujor sha ki pulit ba ha ka janmiet jong ka 9 tarik mynta u bnai, ki runar bym lah ban ithuh ki la ïoh ban prong tuh shapoh ka ïing jong ka kaba don ha Pynthorbah, Shillong bad ban tuh ïa ka pisa kaba long haduh T.3 lak.
Kumjuh ruh na ka liang jong u Bah Melaai Syiemlieh u la ujor sha ki pulit ba ha ka 9 tarik mynta u bnai, u la ïoh jingtip ba ki runar bym lah ban ithuh ki la tuh ïa ki ar tylli ki RRU kiba shong dor haduh kumba T.4 lak na kawei ka jaka ba pynïeng u tower ha shnong Mawten ha South West Khasi Hills.
Ha kaba ïadei bad kane, ki pulit ki dang pynlong ïa ka jingtohkit ban lap ïa ki jingshisha baroh halor kine ki jingjia.
