Shillong, Risaw 15
Ki nongkitkam ka Nongthymmai Konstitwensi kaba hap ha ka NPP Shillong City District Committee kin sa shong ïa ka Executive Committee ha kine taïew ban wan ban pdiang burom ïa u Chief Executive Member (CEM) ka Khasi Hills Autonomous District Council (KHADC) Bah Pynïaid Sing Syiem khnang ban ïoh pynkhreh shaid-shaid ïa ka ilekshon MDC ka ban sa long noh shen.
Katkum ka khubor ba la ïoh lum ha kine ki sngi, ki nongkitkam ka NPP Mawryngkneng Konstitwensi ki la ïoh pdiang ïa ka shithi iehnohkam jong u Bah Pynïaid S Syiem kum u President ka NPP Mawryngkneng Block kaba hap ha East Khasi Hills District.
Hadien ba u la iehnoh kum u President ka NPP Mawryngkneng Block, u Bah Pynïaid u la weng noh ïalade ban long kum u kyrtong ban ïakhun na Sohryngkham Konstitwensi ha ka ilekshon MDC namar u la pynkhreh ban ïakhun noh na Nongthymmai Konstitwensi.
Ki khubor ki ïathuh ba ki nongkitkam ka NPP na Shillong City ruh ki sngewkmen mar shu ïoh ïa kane ka khubor namar ki la ïoh pynïeng kyrtong na Nongthymmai Konstitwensi namar ki dang mut ba kim ïoh kyrtong shuh hynrei mynta ki ïoh ban pynïeng syndon da u CEM ka KHADC.
Ka jingiehnoh u Bah Pynïaid ïa ka Mawryngkneng ka la pynsah umdum ïa ki nongkitkam bad nongkyrshan NPP namar ka por ka la lyngkot ba kin wad kyrtong ban ïakhun ha kane ka ilekshon MDC.
Ki tyllong khubor ki ïathuh ba ka jingsngewskhem u Bah Pynïaid ban ïakhun na Nongthymmai Konstitwensi ka dei hadien ba kane ka konstitwensi ka la thylli noh hadien ba la khlad noh u MDC ba la jop lynter u Bah Latiplang Kharkongor.
