Shillong, Risaw 16
U Vice President ka ri u Jagdeep Dhankar u la buh ïa u mawnongrim ha kane ka nongbah na ka bynta ka Meghalaya Skill and Innovation Hub ka ban sa tei ha ka jaka kaba heh kumba 6.54 akar ha New Shillong ha ka jingmang pisa kumba T. 77.5 klur.
U Lat ka Jylla u C.H Vijayashankar, u Myntri Rangbah ka Jylla, u Conrad K Sangma nalor ki Myntri Sorkar kiba kynthup ïa ka Kong Ampareen Lyngdoh, u Bah A.L Hek, u Rakkam A Sangma, u Chief Secretary Bah DP Wahlang bad kiwei kiwei ki heh ophisar ki la donlang ha kane ka jingïalang buh mawnongrim kaba la pynlong ha State Convention Centre.
U Vice President u la pyllait paidbah ruh ïa ka ‘CM Business Catalyst: Student B-Plan Challenge’ ha ryngkat bad ka IIM Shillong ha kaba la soi ruh ïa ka soskular (MoU) hapdeng ka UNDP bad ka Sorkar Meghalaya ban nang kyntiew shuh shuh ïa kiba thawlad ban pynmih ki kam ki jam.
U Vice President u la wan da ka helicopter jong ki shipai kaba la hiar ha Upper Shillong ha ka por nohphai sngi, bad la pdiang burom ïa u da u Myntri Rangbah, ka Kong Ampareen, u MP ka Rajya Sabha, Dr. W.R Kharlukhi lem bad u Chief Secretary ka Jylla.
Kane ka Meghalaya Skill and Innovation Hub kan pynbiang ïa ki jingdonkam jong ki samla ka Jylla na ka bynta ban pynkhreh ïa ki, ban ai hikai pyntbit, bad ban don ka jingïatreilang da kaba ïateh lok bad ki karkhana.
Ha kane ka jingwan kum u Vice President sha Meghalaya ha ka sien banyngkong, u Dhankar u la leit jngoh ïa ka IT Park kaba don ha Umsawli, New Shillong Township.
Haba ai jingkren ha State Convention Centre, u Vice President u la ïaroh ïa ka Jylla Meghalaya naduh ka jingitynnat bad ka lad kaba lah ban kiew ha ka ïoh ka kot lyngba ka kam jngohkai pyrthei.
U la ïaroh ïa ka Sorkar Jylla bad ïa u Myntri Rangbah u Conrad K Sangma namar ka jingshim ïa ki sienjam ki ban long ka lad ïa ki khun samla ka Jylla bad ka jingtei ïa ka skill and innovation hub kan kyntiew ïa kiba lah ban seng bad pynmih ïa ki kam ki jam bad ai jinghikai pyntbit ïa ki briew kiba dei ban trei ïa ki kam bapher bapher.
U la ong ba ka jinghikai pyntbit ha ki kam bapher bapher ka la kylla long ka jingdonkam ha kane ka juk bad u kyntu ïa ki samla ban long kiba ïaishah ha ka jingshah hikai.
U Vice President u la kyntu ruh ba ym dei ban sngap ïa ki briew kiba ïohi tang ki jingduna bad shu pyrkhat sniew, hynrei dei ban sngap ïa kiba pyrkhat ban wan jia kaei-kaei kaba bha.
U Dhankar u la ong ba u Myntri Rangbahduh ka ri u Narendra Modi u la plie ka jingkhang ïit kaba long ki lad ki lynti na ka bynta ki samla lyngba ki jinghikai pyntbit bapher bapher.
Haba kren shaphang ka jingaiei kaba ka mariang ka la ai ïa ka Meghalaya, u Vice President u la ong ba tang ka kam jngohkai pyrthei ka dei ka lad ka ban pynkiew ïa ka ïoh ka kot jong ka Meghalaya.
U la pyntip ruh ba ka Sorkar Pdeng ka la mang lypa T.60 hajar klur na ka bynta ki jinghikai pyntbit ïa kumba 5 lak ngut ki samla ha kine ki san snem bad ka jingpynkupbor ïa ki samla ha ka ri kan pyntikna ban kiew ka ïoh ka kot ha ka ri.
Shuh shuh u Vice President u la kren ruh shaphang ka Thaiñ Shatei Lam Mihngi kaba don lypa ha ka thup jong ka ri na bynta ki kam pynroi bad kane ka thaiñ ka dei ka nong nohsynñiang ha ka liang ka jingïatylli bad ka jingkiew ha ka ïoh ka kot bad ka lariti ha ka ri.
U la ong ruh ba ka North-East ka dei kaba kongsan tam bad u ïaroh ïa ka Look East bad Act East Policy kaba la pynlong ban kham kiew ki lad jingpynïasoh ha kane ka Thaiñ.
U Dhankar u la ong ba ïa ka kyrdan President jong ka ri la bat da ka kynthei kaba dei ka riewlum, u sngewkmen ruh ba ïa ka kyrdan DGP ha Meghalaya la shimti da ka kynthei kaba dei ka riewlum kaba nyngkong eh ban poi sha kane ka kyrdan.
Namar kata, u Dhankhar u la kyntu ïa ki samla ban long shisha ki nong nohsynñiang bad ki nongdonbynta lang ha ka jingïaid lynti ka India ban poi sha ka thong kum ka ri kaba la kiew ha u snem 2024.
Ha kane ka sngi, u Lat ka Jylla u C.H. Vijayashankar, nalor u Myntri Rangbah, ki Myntri Sorkar bad ophisar ki la donlang ban synran ïa u Vice President.
