Shillong, Risaw 16
Hadien ba u nonghikai ba pawnam ïa uba la tip kyrteng kum u Brother Eric Steve D’Souza bad uba long ruh u dkhot jong ka jingïasyllok Christian Brothers kiba dei ki nongpynïaid ïa ka St. Edmund’s School bad St. Edmund’s College, Shillong u la khlad noh na kane ka sla pyrthei ha ka 13 tarik u Risaw 2024 ha Goa hadien ka jingshitom kaba la ban ïa u la kumba katto-katne snem. Kumta ha ka janmiet jong ka 16 tarik u Risaw 2024, na ka liang ka Balang Catholic Shillong Archdiocese ka la ïoh ban leh burom noh khatduh ïa une u nonghikai ba shemphang bad ruh u khraw pyrkhat da kaba buh ïa ka met jong u hapoh ka skul St. Edmund’ School ha shwa ban rah leit on tep sha u lum jingtep jong ka Balang Katholik kaba don ha Laitumkhrah, Shillong.
Ha kane ka sngi, na ka liang u Myntri Rangbah ka Jylla u la pynlong ïa ka jingleit buh syntiew hajrong ka synduk ba la buh ïa ka met jong u Brother D’Souza bad u la duwai na ka bynta ka mynsiem jong u Brother ba kan poi suk-poi saiñ sha ki jaka ba la pynkhreh. Nalor u Myntri Rangbah, ha kane ka sngi la ïadonlang ruh da ki nongïalam ba hakhmat jong ka Balang Katholik kiba kynthup naduh kiba pyndep ïa ka niam-ka rukom, ki Rangbah Balang, ki riewngeit ka Balang, ki paidbah nalor kiwei-kiwei. La tep ïa u Brother D’Souza ha nongbah Shillong namar ka dei ka jingthrang ba khatduh jong u ban tep ïa ka met kaba sah jong u ha Shillong.
Kum ban shu pynkynmaw ba u Brother D’Souza u la don ha Shillong la bun snem ha kaba u la hikai ïa ki khynnah ha St. Edmund’s School bad u la seng ruh ïa ka skul Providence ha u snem 2000 ban ai jinghikai ïa ki khynnah kiba wan na ki longïing-longsem ba kham duna ha ka ïoh- ka kot. Ym tang katta, u Brother D’Souza u la long ruh u nonghikai jong u khlur ak phlim ka Bollywood, u Shah Rukh Khan, ha St. Columba’s New Delhi.
La kha ïa u Brother D’Souza ha ka 30 tarik Nailur, 1950 bad u la pyndep ïa ka jingpule Graduation ha ka sobjek History na St. Edmund’s College, Shillong ha u snem 1971. U la don ha St. Edmund’s School kum u nonghikai la kumba 28 snem eiei ha shwa ba un mih noh na kane ka skul namar ka jingshitom ha ka met. Ha kitei 28 snem, u la ïoh ban hikai ïa kiba bun ngut ki khynnah ba kynthup ruh ïa u Myntri Rangbah ka Jylla, u Conrad K Sangma.
Na ka liang ki nongkren kiba la ai jingkren ha kane ka sngi tep ki kynthup naduh ki nonghikai jong ka skul St. Edmunds’, ki paralok-parajor, ki khynnah skul barim ki la pynpaw ïa ka jingsngewsih kthang ban duh noh ïa la u jong u nonghikai bad u paralok uba ki ieid eh uba la long ruh u nongbtin lynti ïa ki naduh ba ki dangrit haduh ba kin da mih na kane ka skul.
Na ka liang kitei ki nongkren ki la ong ruh ba wat la u Brother D’Souza u la leit noh na kane ka sla pyrthei hynrei kin ym ïai klet shuh satia ïa ki jingleh babha bad ki jinghikai jong u ha ki por ba u dang im.
