Shillong, Risaw 16
Ka Employment Monitoring Cell jong ka Khasi Students’ Union (KSU) ha ka Sngi Balang ka la leit ban pynsngew hakhmat jong u Myntri ba khmih ïa ka tnat Arts & Culture u Bah Paul Lyngdoh, ïa ka jingduh ka bhah jong u Khasi Jaiñtia ha ka kam Guitar Instructor.
Ka KSU lyngba katei ka Cell ha kane ka sngi ka la ïoh ban pynsngew ïa ka jingbakla na ka liang ka tnat Personnel & AR ban pyntreikam ïa ka roster, ha kaba ka post jong “Guitar Instructor” ha ka State Institute of Arts & Culture kan leit lut 100% sha ka Garo category.
Ha ka kyrwoh ba la pyllait da u Chairman ka Employment Monitoring Cell u samla Reuben Najiar u la ong, ha ka 14 tarik u Risaw, 2024 ka KSU ka la ïakynduh ïa u Bah Cyril VD Diengdoh, IAS uba bat kum u Secretary ka tnat Personnel & AR halor kane ka mat hynrei kam shym la hun satia ïa ka jubab ba la ïoh na une u ophisar u bym shim don ïa kano-kano ka jingkitkhlieh ba kan duh noh ka bhah jong ki Khasi Jaiñtia ha kane ka post. Hynrei la kren kyllaiñ bad pyni ïa ki jingeh ban pynkylla ïa kane ka kam ba la dep pynbna.
Ka Seng ka ngeit skhem ba kine kiei-kiei baroh ki jia namar ba ka Sorkar lyngba kane ka tnat Personnel & AR kam shym la pyntreikam ïa ka roster katkum ki jingpynshai ba la ai sha ka Seng bad sha ki paidbah ba ka roster kan ïaid shakhmat khlem kylla dien (prospective) hynrei ka long pynban da khongpong (retrospective). Ka jingleh jong kane ka tnat kan pynduh noh ïa ka bhah ba dei ban ïoh ki Khasi haduh u snem 2040-2045.
Halor kane ka jingpynsngew, na ka liang jong u Bah Paul Lyngdoh, Myntri ba dei peit ïa kane ka tnat u la kular ban shimkhia halor kane ka bynta.
