Jowai, Risaw 16
U MLA barim ka Nartiang Konstitwensi, Bah HB Dan ba ju khot ieid Ma Ten, u la khlad noh na kane ka sla pyrthei ha ka step 16 tarik Risaw ha ïingsah jong u ha Dulong hadien ka jingshitom kaba la neh tang katto-katne bnai.
U Bah HB Dan u la long teng kum u MLA ka Nartiang Konstitwensi lai sien ha ki snem 1978 (Minister of State), 1988 bad 1998 (Cabinet Minister) da kaba bat ruh ïa ki tnat bapher bapher jong ka Sorkar Meghalaya.
Nalorkata u la ju bat ruh kum u Nongïalam ka Liang Pyrshah hapoh ka ïingdorbar thawaiñ ka Meghalaya. U la shah jied ruh kum u MDC ar sien bad bat ruh ïa ka kyrdan CEM jong ka JHADC lai sien.
Nalor kata u la long ruh u ‘riew rangbah uba ju ai buit ai bor ha ka synshar-khadar bad ka saiñ hima-sima.
U la iehnoh shadien ïa ka kurim bad 7 ngut ki khun kynthup 4 ngut ki shynrang bad 3 ngut ki kynthei lem bad 19 ngut ki khun ksiew.
Ka jingkhlad noh jong une u rangbah ka long ka jingduh kaba khraw ïa ka ïing ka sem, ki kur ki jait, ki kha ki man, ki lok ki jor, ka Balang bad ka shnong ka thaw.
Ka sngi leit ontep kan long ha ka 18 tarik Risaw naduh ka por 12.00 baje mynsngi (na ïing) ha u lum jingtep jong ka Balang Presbyterian Jowai.
Ha kawei pat ka liang, u Lamphang ka ïingdorbar thawaiñ ka jylla u Thomas A Sangma, u la pynpaw ïa ka jingsngewsih halor ka jingkhlad noh jong u nongmihkhmat barim u Bah H Britainwar Dan.
U Thomas A Sangma u la phah ruh ka jingsngewlem sha i kurim, ki khun bad ka ïing ka sem baroh bad ong ba ka jingkhlad ka la long ka jingduh kaba khraw ïa ka ïing ka sem hi baroh kawei.
