Shillong, Nailur 16
Ka jingïalang ba la khot da u Commissioner & Secretary ba dei peit ïa ka tnad shangkai pyrthei halor ka jingthmu ban buh ïa ka Facilitation Centre ha Umling ha Ri-Bhoi kam shym la lah ban pynhun ïa ka Khasi Students’ Union (KSU), ha kaba u General Secretary barim u samla Donald V Thabah u la ong ba ka Sorkar kam pat pyni ïa ka jingshimkhia halor ka aiñ Meghalaya Residents Safety and Security Act (MRSSA).
“La khot ïa ngi ban ïakren ha kaba ïadei bad ka jingbuh ïa ka Facilitation Centre ha Umling kaba dei ka jaka rung, watla katta tang ki ophisar kiba don hangta ki dei tang na ka tnad jngohkai pyrthei,” la ong u samla Donald hadien ka jingïalang kaba la long mynta ka sngi Balang.
U la ong ba ka tnad jngohkai pyrthei ka la batai ïa ka jingthmu jong ka na ka bynta katei ka pdeng, hynrei ki jingeh ba kongsan jong ka KSU ki dang sahkut.
“Mynshwa ka KSU ka la pyrshah ba ka jaka ba la buh kyrpang na ka bynta ka Facilitation Centre ka long kaba duna bha, watla katta ruh kaba bun ka jaka la shim da ka Food Court. Ngi la pynpaw ïa ka jingpyrshah bad ka tnad jngohkai pyrthei ka la pyntip ïa ngi ba kham mynshwa ka jaka ba la buh kyrpang ka long 1000 sq ft, mynta kan long 4000 sq4ft.
“Ngim lah ban ai jingkular ïa ki ba ngi sngewhun ïa kaei kaba ka tnad jngohkai pyrthei ka thmu namar ba ki nongïalam jong ngi ki don ha phatok. Ngi hap ban ïakren shwa bad ki, hato ka 4000 sq4ft ka biang ne ngi dawa shuh shuh,” u la ong.
U samla Donald u la kdew ba ka jaka rung kam dei tang na ka bynta ki nongjngohkai pyrthei.
“Ngi sngewthuh ba ki briew kiba rung sha kane ka Jylla kim dei tang ki nongjngohkai pyrthei, ki dei ki nongbylla, ki samla pule, ki heh sorkar bad bun kiwei pat ki ban wan na ka bynta kiwei pat ki kam khaïi,” u la ong.
U la ong ba ka jingai jaka mynta ka long kaba duna bad kaba long shiliang.
“Ngi ïohi ba la mang tang 2 tylli ki kamra na ka bynta ka tnad jngohkai pyrthei, kawei na ka bynta ka tnad Infiltration bad kawei na ka bynta ka tnad kam pohïing. Ngi sngew ba dei ban don kiwei pat ki counter kiba kyrpang na ka bynta ki nongbylla, ka koit ka khiah, ka pule puthi bad kiwei-kiwei ki tnad ruh, namar lada ngi don tang ka counter jong ka kam jngohkai pyrthei te kan don ka jingshong laiñ kaba jrong,” la ong usamla Donald.
“Hooid, ki lah ban apply online, hynrei ki don katto katne ki bym lah ruh, kumta ngi sngew ba baroh kita ki tnad ki dei ban don hangta. Namar ba ki la phone ïa ngi tang na ka tnad jngohkai pyrthei, ki la pyntip ba kim lah ban kren na ka bynta kiwei pat ki tnad,” u la bynrap.
Da kaba khot ïa ka jingïalang ba kam shym la seisoh, u samla Donald u la ong, “Kane ka jingïalang kam shym la seisoh, ngim sngewhun ïa ka jingïalang namar ba tang ki heh na ka kam jngohkai pyrthei ki la don hangta.”
Halor ka jingthmu ban tei ïa ka Facilitation Centre ha Rattachera, u la ong ba ka tnad ka la shu ai kum ka jingpyntip.
“Ngi la kylli jingkylli na ki, shaphang ka Rattachera, kumta ki la ïathuh ïa ngi ba ka jingshim jaka ka dang ïaid shakhmat, ki la poi kumba 50% hynrei kim shym la pyntip ïa ngi kaei ka jaka ba shisha na ka bynta ka jaka pynsuk. Kumta ngim tip la kata yn pynkylla sha ka jaka rung ne jaka mih ne em,” u la ong.
Utei u nongïalam barim ka KSU u la ong ba ka Sorkar ka dei ban pynkylla ïa ka rukom treikam jong ka bad ban pynlong ïa ka jingïakren kaba bniah halor ka MRSSA, ym da kaba ïakynduh tang na kawei ka tnad.
“Lada ka Sorkar ka pynrung ïa ngi ban ïakren, ngi kwah ban ïakren shaphang ka MRSSA. Kumba mynta ka sngi ngi la ïakren bad ka tnad jngohkai pyrthei bad nangta kin sa ïakren biang bad ngi bad ka tnad Labour. Ngi sngew ba baroh ki heh na baroh ki tnad ki dei ban don hangta,” la ong u samla Donald.
“Haba ngi wan shane na ka bynta ka jingïalang, ka jingthmu jong ngi ban ïakren ka long ban pyntreikam ïa ka aiñ ba kongsan ka MRSSA. Ngi sngew ba ka Sorkar ka dei ban sdang ïa ka rukom kaba kham bha, ka lad kaba kham bha kumno ban ïakren bad ngi ha kaba ïadei bad ki Facilitation Centre” u la bynrap.
