Shillong, Nailur 16
Ka Sorkar Meghalaya ka la pynmih ïa ka SOP jong ka ‘Combined Counselling’ na ka bynta ban ïoh rung sha ki 138 tylli ki ‘seat’ MBBS jong u snem 2026-27.
Ïa kane ka kam, yn sa pynïaid da ka Meghalaya State Counselling Authority for Medical Education (MSCAMA) da kaba pynshong nongrim ha ki kyrdan jong ka NEET-UG, 2026.
Kitei ki 138 tylli ki ‘seat’ ki kynthup ïa 96 tylli ki ‘seat’ kiba hap hapoh ka ‘Central Pool’ bad kiwei-kiwei ki bhah ba la mang sha ka Meghalaya lem bad 42 tylli ki ‘seat’ ba bhah ïa ka Jylla haba ïadei bad ka Shillong Medical College (SMC).
Katkum ka SOP, kitei ki 96 tylli ki ‘seat’ ki kynthup ïa 53 tylli ha ka ‘Central Pool’, 14 tylli ha NEIGRIHMS, 16 tylli ha RIMS-Imphal, 10 tylli ha Assam Government Medical College bad 3 tylli ha Tripura. Ka bhah kan long mar 39 na ka bynta ki Khasi-Jaiñtia bad Garo, 14 ïa ki ‘Unreserved’ bad 4 ïa ki ‘SC’/’OST’.
Na ki 50 tylli ki ‘seat’ ba la mynjur da ka NMC na ka bynta ka SMC mynta u snem pule, 8 tylli kin leit sha ka ‘All India Quota’ bad 42 tylli sha ka ‘State Quota’, ban bhah katkum ka ‘State Reservation Policy’ – 40% ki Khasi-Jaiñtia, 40% ki Garo, 15% ki ‘Unreserved’ bad 5% ki ‘SC’/’OST’.
Ki samla kiba lah ban pule ïa kane ka laiñ ki donkam ban pyndep ïa ka klas XII ryngkat ka ‘Physics’, ‘Chemistry’, ‘Biology’/’Biotechnology’ bad ka ‘English’, ka rta kaba duna tam, kata 17 snem haduh ka 31 tarik u Nohprah, 2026, nalor ka jinglong trai-ri ryngkat ki PRC bad ki syrnot pynshisha kyrdan.
Ka ‘Counselling’ kan don saw tylli ki kylla ba kynthup ïa ka ‘Stray Vacancy Round’, ha ryngkat ka jingpynrung kyrteng ‘Online’, ka jingpynshisha ïa ki kot ki sla bad ka jingpyntip da kaba wan mih hi dalade.
La buh ruh ïa ki kyndon na ka bynta ban aiti ne pynphai noh ïa ka ‘seat’, ka jingkhmih bniah ïa ka PwBD bad ‘Tie-Breaking’.
Ka Sorkar ka la pynlong kongsan ïa ka ‘Service Bond’ kaba 5 snem na ka bynta ki samla pule kiba shah pdiang hapoh ki ‘seat’ ba la kyrshan da ka Jylla, ban shakri ha ki ‘Hospital’ Sorkar ne ki ‘Hospital’ mishon ba la ithuh.
Ha kajuh ka por, kan don ruh ka ‘Control Room’, ka jaka ai jingïarap nalor kiwei ki ban treikam ha ka por ba pynlong ïa ka ‘Counselling’.
Shuh shuh la bthah ïa ki kyrtong ba kin bud tang ïa ki jingpynbna ba la pynmih da ka MSCAMA bad ban husiar na ki jingpynbna ba lamler bad ki ‘website’ thok.
