Nongpoh, Nailur 16
Hadien saw sngi kynthih ba uwei u samla ba dang 21 snem ka rta na ka shnong Baridua ula jah na la ïing, ha ka sngi Balang ki nongshong shnong ki la lap noh ïa ka met kaba sah jong utei u samla kaba la per ha sla um jong ka pung kaba ju khot kum ka Blue Dam kaba don ha katei hi ka shnong.
Ïa ka met kaba sah jong utei u samla uba la tip kyrteng kum u Rohit Poudel, la lap nyngkong da ki nongshong shnong kiba leit wad ïa u, kiba la pyntip pat sha ki nongpynïaid shnong bad hadien la pyntip pat sha ki bor pulit ka Ri Bhoi.
Na ka liang ki bor pulit ha ryngkat ka tnad Fire & Emergency Services na Narbong ki la wan poi ban sei noh ïa ka met jong utei u samla na katei ka pung bad la pynkit noh sha Civil Hospital Nongpoh na ka bynta ban pyndep ïa ka post mortem hashwa ban aiti pat sha ki bahaïing hasem hadien ba la pyndep ïa ki jingdonkam baroh katkum ki kyndon aiñ.
