Mawkyrwat, Nailur 16
Ka jingïaknieh ïa ka tiket ban long u kyrtong ha ka ilekshon MLA ha u 2028, ka la sdang paw ha ka NPP, kaba pyni ruh ïa ka dak orpait jong ka NPP ha Ranikor Constituency da ka jingmih jong ki ar kynhun.
U Bah Mandilos Nongbri, u kyrtong MDC ka NPP uba la shah rem noh ha u Bah Pius Marwein ha ka ilekshon MDC ba la dep ryngkat ki nongkyrshan jong u ha ka 16 tarik u Nailur 2026 ki la lum ïa ka jingïalang kyrkieh ha Nongjri ban ïatai bad bishar bniah halor ki rai ba la shim ha ka jingïalang ba la pynlong da u Nelbi T Sangma ha ka 8 tarik Nailur, 2026 ha Rangthong ha kaba ha katei ka jingïalang la pynbna ïa u Nelbi T Sangma kum u kyrtong MLA ka NPP ha u 2028.
Ha kane ka jingïalang ha Nongjri, South West Khasi Hills District, palat hajar ngut ki nongkyrshan u Bah Mandilos Nongbri bad ki nongïalam ki la kyntait bad kim pdiang halor ka rai kaba la shim ha Rangthong.
U Bah Mandilos Nongbri haba kren sha ki lad patai khubor u la ong ba ka jingkhot ïa ka jingïalang, ka long ban pyrshah jur halor ka rai kaba la dep ha kaba u Nelbi T Sangma, President NPP Ranikor Block Unit u la rai ïalade kum u kyrtong MLA ka NPP ha u snem 2028.
U Bah Mandilos u la ong ruh ba u Nelbi u la thok ïa ki paidbah namar ha katei ka sngi u khlem khot jingïalang na ka bynta ban jied ïa u kyrtong, hynrei la khot ïa ka jingïalang ban ïa pyrkhat ïa ki kam ha kaba ïadei bad ka ilekshon MP bad kiwei-kiwei ki kam.
Shuh shuh u la kynnoh ruh ba u Block President u Nelbi, u Secretary u Itchin D Shira bad u State Secretary In-charge ka South West Khasi Hills District Bah Kitborlang Nongrem ki la leh donbor da kaba weng noh ïa u na ka Whatsapp Group jong ka NPP Ranikor ym tang kata, ki khlem pyntip ruh ïa ki nongkyrshan jong u ha ka jingïalang kaba la long ha ka 8 tarik ha Rangthong ha kaba ki la pynbna ruh da ka bor ïa u kyrtong na ka bynta ka ilekshon 2028 khlem ka jingbthah ki bor bahalor ka seng.
“Ngim lah ban pdiang ïa katei ka rai, ngi la phah jingthoh bad leit ïakynduh ïa u National President ka seng ha kaba ïadei bad katei ka kam,” ong u Bah Mandilos bad u la ïathuh ruh ba u Conrad Sangma u la pynthikna hakhmat jong u, ba un nym pdiang ïa katei ka rai da kaba u la bynrap ruh ba katei ka rai kaba la shim ha katei ka sngi ka long pyrshah ïa ki kyndon jong ka seng namar na ka liang ka NPP haduh mynta kam pat rai ïa ki kyrtong ha baroh ki Constituency ha kaba ïadei bad ka ilekshon MLA.
U Bah Mandilos u la ai khublei ïa ki nongkyrshan kiba la kyrshan ïa u ha ka ilekshon MDC, watla u khlem poi sha ka thong hynrei u la ïoh haduh kumba 10 hajar tam ka vote bad u la ong ruh ba kim don bynta eiei ban pynpait pynpra ïa ka party hynrei ki la rai ba kin ai ka jingkyrshan kaba skhem ïa u Dr. DRL Nonglait.
U la ong ruh ba ha kane ka jingïalang ki nongkyrshan bad ki nongïalam da kawei ka sur ki la rai ban pynsngew ha ki nongïalam bahalor da kaba dawa ba dei ban bujli noh ïa ki nongïalam ka Ranikor Block kata ïa u President Nelbi T Sangma bad Secretary u Itchin D Shira kiba don jingthmu ban pynpait pynpra ïa ka NPP ha Ranikor.
