Shillong, Nailur 16
Watla ki don napdeng ki 8 ngut ki MLA ka UDP kiba la pynbna paidbah ïa ka jingthmu jong ki ban rung noh shen sha ka Bharatiya Janata Party (BJP), u khlieh nongïalam ka seng, u Bah Metbah Lyngdoh ha ka Sngi Balang u la kyntait ban pdiang ïa kane, da kaba ong ba ka jinglong-jingman ka long “shiteng ka jingshisha” ne ‘half truth’ bad tang ki hamsaïa.
“Ka hamsaïa kan long beit ka hamsaïa. Na ka bynta jong nga, nga kheiñ ïa ka kumne – kam dei kaba shisha ne ka bym dei. Kumta, ka dei shiteng ka jingshisha,” ong u Bah Metbah ha ki nongthoh khubor haba kylli halor ka jinglong-jingman jong ki MLA kiba thmu phet seng.
U la kubur ba ïa kane ka kam la ïakren hapoh ka seng.
“Ka jinglong-jingman jong ka hamsaïa kaba la saphriang kylleng ha kine ki taïew baroh, ha ka jingshisha kum ka seng ngi la dep ban don ïa ka jingïalang jong ngi bad la sngewthuh ba haduh katno, kiei-kiei baroh ki la don hangta hapoh ka jingpyrkhat jong kito ki MLA kiba kwah ban ïasoh bad kiwei pat ki seng saiñ pyrthei,” u la ong.
U President ka UDP u la ong ba ka seng ka dang pyrshang ban pynshai ïa ki jingartatien bad jingbym ïasngewthuh jingmut hapdeng ki dkhot ba la jied, hynrei kam shym la lap ïa kano-kano ka jingbym sngewhun kaba tikna.
“Na ka bynta jong nga, ïa mynta hi, ryngkat bad ka seng, ngi dang buddien ïa kane ka kam ban pynshai ïa kino-kino ki jingartatien ne kino-kino ki jingbym ïasngewthuh jingmut hapoh ka seng hapdeng ki dkhot ba la shah jied. Hynrei haduh mynta, ngim pat ju ïakynduh ïa kano-kano ka jingbym sngewhun na baroh ki MLA ba la shah jied, kaei-kaei kaba ki la pynpaw la ka long marwei-marwei, la ka long ha ka jingïalang kaba ngi la don ruh na ka por sha ka por. Nga la ïohsngew ruh na iwei-ar ngut ki MLA kiba la pynpaw shai ba kim don eiei pyrshah ïa ka seng ne ki nongïalam jong ka seng,” u la ong.
Haba kylli katno ngut ki MLA kiba dang don bad u, u Bah Metbah u la ong ba u kheiñ ïa baroh 12 ngut kum kawei ka kynhun.
“Na ka bynta jong nga, nga kheiñ ïa baroh ki 12 ngut ki MLA kum kawei. Ka jingkylli ban don ryngkat bad nga ne em kam mih, namarba ngi don hapoh kawei ka shatri, hapoh kawei ka tnum bad ngi don hapoh kawei ka seng. Ngi la ïaid beit ïaid ryntih baroh kine ki snem kum ka seng khlem da don kano-kano ka jingdon ki MLA ban long na ka bynta jong nga ne ka jingdon ki MLA pyrshah ïa nga. Kaba biang eh ka long ba phin wad bad kylli na baroh kiwei pat ki MLA, la ki don bad nga ne badno, ngam tip ïa kane,” u la ong.
Halor ka sienjam ba un shim ban khanglad ïa ki 8 ngut ki nongthaw aiñ ban leit pynïasoh sha ka BJP, u Bah Metbah u la ong ba ka seng ka dang ïakren bad ki.
“Na ka liang jong ka seng, ngi dang buddien, ngi pyrshang ban pynshai sha ki lada ki don kano-kano ka jingartatien ne ka jingbym sngewhun hynrei watla katta, ngim shym lap ïa kino-kino kiba ngi lah ban pyrshang ban pynshai bad ki jingthmu jong ki ban ïasoh bad kiwei pat ki seng saiñ pyrthei. Haduh mynta, na ki ruh kim pat shai bha la kin ïasoh mynta ne kin ïasoh lashai. La pynsngew na ka por sha ka por, kata baroh ka shong ha ka por, kumta to ngin ap tang ïa ka por. Tad haduh bad lymda ki shim ïa ka rai, hynrei hashuwa kata, ngi la pyrshang katba lah ban ïohi ba ngi don ka jingïakren, bad ngi dang ïakren bad ki bad don ruh ki jingïalang bad kine ki MLA baroh na ka por sha ka por,” u la bynrap.
