Shillong, Risaw 16
Ka United Democratic Party (UDP) ka la ong ba ka rai haba ïadei bad ka jingpynïeng kyrtong ha ka ilekshon shiteng samoi ha Gambegre konstitwensi ka shong ha ki nongïalam ka seng kiba na Ri-lum Garo.
“Ngin sa don ïa ka jingïalang Central Execu-tive Committee (CEC) ha ka 18 tarik mynta u bnai bad hadien kane, ngin sa lah ban ïakren bad pyrkhat halor kane ka bynta – la yn pynïeng kyrtong ne em ha kane ka ilekshon shiteng samoi ban wan,” ong u General Secretary ka UDP, Dr. Jemino Mawthoh.
Ha kajuh ka por, u la ong ba ka seng kan ap shuwa ïa ka kaiphod na ki nongïalam Garo bad sngap ruh ïa ki jingpynsngew na ka liang jong ki ba kin wanrah ha ka CEC.
“Kane baroh kan shong ha ki jingtip bad jingpynsngew na ka liang jong ki. Ïa ka rai la yn pynïeng kyrtong ne em, yn sa tip hadien jong ka CEC ka ban sdang ha ka por 1 baje mynsngi,” ong utei u nongïalam.
Kum ban shu kdew hangne, ka ilekshon shiteng samoi ha Gambegre konstitwensi kan long ha ka 13 tarik Naiwieng katba ka jingñiew ‘vote’ kan long ha ka 23 tarik Naiwieng.
Kane ka konstitwensi ka la sah thylli hadien ba u MLA ka Congress, u Saleng A. Sangma u la hap ban ieh noh ïa ka jinglong nongmihkhmat hadien ba u la jop bad shah jied kum u MP ka Tura Parliamentary konstitwensi ha kane ka ilekshon Lok Sabha mynta u snem.
Ka National People’s Party (NPP) ka la dep pynbna ïa ka kyrteng jong ka Dr. Mehtab Chandee Sangma, kurim jong u Myntri Rangbah ka Jylla, u Conrad K. Sangma kum ka kyrtong, katba ka liang pyrshah – All India Trinamool Congress (AITC) ka la pynbna ïa ka kyrteng jong ka Sadhiarani Sangma kum ka kyrtong. Ka Sangma ka dei ruh ka MDC jong ka Garo Hills Autonomous District Council (GHADC).
Ha kawei ka liang, ka Congress bad BJP (ka seng ba ïatehlok bad ka NPP ha ka Sorkar MDA) kim pat pynbna ïa ki kyrtong jong ki.
Shuh shuh ka kyrteng jong u Jingjang M. Marak – uba ïajan bad u Saleng A. Sangma ka la mih shakhmat bad u lah ban long u kyrtong jong ka Congress, katba u MDC ka BJP ha GHADC, u Bernard N. Marak u la sdang ïa ka jingpynkhreh jong u ha Gambegre konstitwensi.
U Saleng u la mihkhmat ïa ka Gambegre konstitwensi naduh u snem 2013 wat la u la shah jied nyngkong eh kum u MLA ha u snem 2008 (na ka Congress) na Dalamgiri konstitwensi (hashuwa).
U la kynriah noh sha Gambegre konstitwensi ha u snem 2013 hadien ka jingpynbeit thymmai ïa ki konstitwensi hapoh ka Jylla bad hadien kane, u la shah jied lynter haduh ka ilekshon sha ka ïingdorbar thawaiñ ka Jylla ha u snem 2023 khlem shah rem.
