Pan jingmut ka Sorkar na ka SEC halor ka jingdawa; Yn bteng ka AMSSASTA ïa ka jingïakhih kat bym pat leh eiei ka Sorkar

Shillong, Risaw 16

Ki nonghikai Samagra Shiksha Abhiyan (SSA) kiba hapoh ka synjuk jong ka All Meghalaya SSA School Teachers’ Association (AMSSASTA), ki la rai ban dang bteng beit ïa ka jingïakhih shong kyllaiñ mungor ha Madan Malki haduh ba ka Sorkar kan leh eiei halor ka jingdawa pynkiew tulop shispah persen.

Ka jingïakhih ki nong -hikai hapoh ka AMSS ASTA ka la kynjoh sha 16 sngi ban pynbor ïa ka Sorkar ba kan pynkiew noh ïa ka tulop da shispah persen. Wat hapdeng kane ka jingïakhih ki nongïalam kane ka kynhun ki la ïaid ruh ban ïakren bad ki heh ka tnat pule puthi ka Jylla ban pynurlong ïa ka jingdawa, ha kaba hynne ka Sngi Balang ki nonghikai SSA ki la ïakynduh ïa u Commissioner Secretary, bad kumjuh ïa u Myntri ka tnat pule puthi, u Rakkam A Sangma.

“Ha ka jingïakynduh bad u Myntri, u la pyntip ba ka Sorkar ka la shim ïa ki sienjam, tangba kan kham shimpor namar ïa ka kam la aiti sha ka State Education Commission ban bishar bniah, bad ka Sorkar ka dang ap ïa ka jingai jingmut na ka Commission”, la ong u Vice President ka AMSSASTA, u Bah Defender S Lamare.

U Bah Lamare u la ong, namar ba ka Sorkar ka la sdang ban bishar ïa ka jingdawa jong ki, ka kynhun ki nonghikai kam don eiei halor kata, hynrei ka khmih lynti pat ba ka Sorkar kan pynstet ïa ka kam, khnang ba ki nonghikai kin nym shem jingeh shuh bad ba kin lah ban leit hikai ïa ki khynnah sha ki skul khamtam hadien 16 sngi ba ki la ïakhih.

Haba ïakren bad u Myntri ka tnat pule-puthi, u Rakkam A Sangma u la ong ba ka Sorkar ka la phah sha ka State Education Commission ban pule bniah ïa ka jingdawa ki nonghikai Samagra Shiksha Abhiyan (SSA), bad mynta ka Sorkar ka dang ap ïa ka jingai jingmut na ka Commission.

U la ong ba ka Sorkar ka kwah ban pynbeit shisyndon ïa ka jingeh ki nonghikai, “Ngi la pynkhreh saw-san tylli ki lad kumno ban weng ïa ki jingeh jong ki nonghikai, kumba ka long mynta ka jingmang pisa kadei ka jingeh, na kata kadaw ngi ap mynta ïa ka jingai jingmut jong ka State Education Commission ban ïaid shakhmat da kaei kaba bha tam”.

U Myntri u la ong ba ka long shisha kaba khia ïa ka Jylla ha kaba ïadei bad ka pisa namar ki nonghikai SSA ki don kumba 13,000 ngut, hynrei na ka liang ka tnat kan sa pynsngew ruh da kiwei ki lad hapoh ka Kynhun Myntri bad ha u Myntri Rangbah.

“Ban shu pynkiew beit ïa ka tulop, kane kajuh ka jingeh kan sa bteng biang hadien”, u la ong.

U Rakkam u la ïathuh ba u la kyntu ruh ïa ki nonghikai ba kin sangeh noh ïa ka jingïakhih da kaba leit phai sha ki skul na ka bynta ki khynnah.