Shillong, Risaw 17
Ka Khasi Hills Autonomous District Council (KHADC) ka la rai ban thoh sha ka Sorkar ba kan ithuh bad ñiew kyrpang ïa ki Rangbah Shnong man la ka por da kaba pymih da ka jingpynbna ba kyrpang khnang ba ki bor district ruh kin lah ba ithuh, ym tang ha ka por ba ka Sorkar ka donkam.
Ïa kane ka rai la shim ha ka jingïalang ki Rangbah Shnong ka sor Shillong kumjuh ka Synjuk ki Nongsynshar Shnong ka Bri Hynñiewtrep (SNSBH) ba la khot da u Deputy Chief Executive Member ba khmih ïa ka tnat Elaka ha KHADC, u Bah Pynshngaiñ N Syiem.
U Bah Pynshngaiñ u la ong ba don ki Rangbah Shnong kiba pynpaw ba haba ki pyrshang ban tuklar ïa kino-kino ki kam hapoh shnong, na ka liang ki pulit bad ki majistor kim ñiewkor lane ithuh satia ïa ki Rangbah Shnong, bad bynrap ba dei halor kane ka donkam ban don da ka jingthoh kaba shai khnang ba ha kano-kano ka por ba don jingeh lane jingjia ha shnong ha thaw kin tip ba don u Rangbah Shnong.
“Ha ka por COVID ki Rangbah Shnong ki la ïarap bha ïa ka Sorkar, kumjuh ha ki por ba shah ktah ka suk ka saiñ, hynrei hadien ba la kut ka COVID bad bym don kano kano ka jingeh ïa ki Rangbah Shnong ym don ba ithuh shuh”, u la ong.
U Bah Pynshngaiñ u la ïathuh ruh ba ha ka jingïalang, ki nongsynshar shnong ki la pynsngew ba donkam ban pynneh pynsah kumjuh ïa ka riti ka dustur ha ka jingpynbeit thymmai biang ïa ka Khyrnit kaba Hynriew hapoh ka riti synshar.
