Shillong, Risaw 17
Ka Khasi Hills Autonomous District Council (KHADC) ka la rai ban pynrung ïa ki kyndon kiba khlaiñ ha ka Khasi Hills Autonomous District (Administration of Elaka) Amendment Act, khnang ban ïakhun bad tehlakam ïa ka jingkynrei jong u drok ha ki shnong ki thaw.
Hynne ka Sngi Palei u Deputy Chief Executive Member ka KHADC, u Bah Pynshngaiñ N Syiem u la lum ïa ki rangbah shnong jong ki shnong hapoh sor Shillong bad kumjuh ïa ka Synjuk ki Nongsynshar Shnong ka Bri Hynñiewtrep (SNSBH) ban ïakren kumno ban thaw lad na ka bynta ban ïakhun pyrshah ïa u drok ha ki shnong ki thaw.
U Deputy CEM u la ong, lyngba ka KHAD (Administration of Elaka) Amendment Act ba dang shuh ïoh muhor na u Lat, ka don ka Vigilance Committee kaba lah ban ïatreilang bad ki bor ka aiñ ban teh lakam ïa ka jinglaitlan jong u drok, bad kumjuh ba ki seng kynthei bad ki seng samla shnong kin lah ban peit pyrman ha kaba ïadei bad ka jingsniew ha ki shnong.
U Bah Pynshngaiñ u la ong ruh ba ha ki khyrdop (Entry/Exit point), ki shnong ha kito ki thaiñ kin ïatrei lang bad ki bor Sorkar ban khanglad ïa ka jingïoh rung jong u drok.
Haba kylli ba kane ka aiñ ka lah ban ïatyngkhuh bad ki aiñ ka Sorkar, kum ka Narcotic Drugs and Psychotropic Substances (NDPS) Act, 1985, u Deputy CEM u la ong, “Ka bynta jong ka Council kan nym don jingïadei eiei lane ïatyngkhuh bad ka NDPS Act, namar ka jingthmu jong ki kyndon hapoh ka (Administration of Elaka) Act, ka long ban rat dienkhong bad ïakhun ïa ki jingsniew ha ki shnong ki thaw.
“Ngin pyrshang katba lah ban leh tang ha ka bor jong ka KHADC bad ki shnong, khlem da ïaid palat khnang ba kan nym ïatyngkhuh bad ki aiñ ka Sorkar kum ka NDPS Act”, u la ong.
U Deputy CEM u la ong ruh ba ki kyndon hapoh ka NDPS Act, kim dei kiba khlaiñ haduh katta-katta, namar don ki kyndon kiba kdew ba hapoh 5 gram u drok lah ban rah kiba dih, bad bynrap ba ki seng samla shnong, ki rangbah shnong ki ïakynduh jingeh namar ki shu bunkam kai tang ha ka leit long sakhi ha Kashari.
