Bengaluru, Risaw:
U Chairperson jong ka Mysore Urban Development Authority (MUDA) u K Marigowda, ha ka sngi Balang u la hiar shuki hapdeng ka por ba u dang shah tohkit halor ka jingshah kynnoh bamsap jong u Myntri Rangbah ka Karnataka u Siddaramaiah, la ïathuh ka tyllong khubor.
U Marigowda, uba don ka jingïajan bad u Siddaramaiah, u la hiar shuki shwa halor ka jingaidaw ba u don ka jingthut ha ka met bad na ka jingai hukum jong u Myntri Rangbah. U Marigowda kumba la pynpaw da ka lad phah khubor u la ong, “Nga la ïakynduh ïa u Myntri bad aiti ïa ka shithi iehnohkam jong nga. U Myntri Rangbah u la bthah ïa nga ba ngan iehnohkam, bad da kaba bud ïa ki jingbthah jong u, nga la leh kumta. Nalor kata, namar ka jingshah ktah ka koit ka khiah jong nga, nga la rai ban hiar shuki noh. Ka la don ka jingtohkit kaba dang ïai bteng shakhmat. Ka jingtohkit halor ka jingshah kynnoh kan pynpaw ïa baroh ki jingshisha.”
“Kam shym la don kano kano ka jingpynbor halor ka jingiehnohkam jong nga. Ka met jong nga kam don hapdeng ka jingkoit jingkhiah, kumta nga la rai ban iehnohkam da ka mon sngewbha. Nga la ithuh ïa u Myntri Rangbah la palat 40 snem. U la thung ïa nga kum u President jong ka distrik bad um ju bthah ïa nga ba ngan leh ïa kaei kaei kaba long beaiñ, kynthup ha kaba ïadei bad ki kam ka MUDA. Nga la iehnohkam na ka daw shimet jong nga; nga la shah ktah ha ar tylli ki Stroke bad ngam lah ban bteng ïa ka kam,” la ong u Marigowda.
