Shillong, Risaw 17
U Bah Paul Lyngdoh uba long u Myntri ba khmih ïa ka tnat Social Welfare ka Jylla u la ong ba u President ka Hynñiewtrep Youth Council (HYC) u dei ban tip bha halor ki aiñ NDPS bad kiwei namar u la don lypa ka jingtip ha kaba ïadei bad ki kam aiñ.
Haba kren sha ki lad pathai khubor ha kaba ïadei bad ki seng kum ka kam ba la pynïaid shakhmat da ka HYC ban ïakhun pyrshah ïa u drok hapoh ka nongbah bad ka jingshah khot hajir ha ki pulit, u Bah Paul u la ong, “U President jong ka HYC da lade u dei uba la don jingtip bad ka jingnang jingstad ha ka liang jong ka aiñ. Phi dei ban kylli na u. Kylli na u, kaei kaba u tip halor ka NDPS? Halor ka PITNDPS, bad hato ka aiñ ka ailad ïa u ban ïaid shakhmat bad ban kem ïa baroh ki briew. Phi lah ban kylli na u nongïasaid aiñ”.
Halor ka jingkurup bad thang ïa u drok da ki dkhot jong ka HYC, u Bah Paul u la ong, “Mynta, haba phi leh ïa kano kano ka kam kaba pyrshah ne kaba ïaid pyrshah ïa ka jinglong ba kongsan jong ka aiñ, ka jingtrei jong phi ka kylla long kaba be-aiñ, kumta phi lah tang ban shu paw ha ki khubor, hynrei kam don jingpher eiei pat ha madan. Phi lah ban mih ha ki khubor na ka bynta ar sngi, hynrei nangta kaei kaei kaba phi leh, kan ym lah ban ïeng ha ka jingbishar bniah jong ka ïingbishar, bad kumta ka long kaba pynrem ïalade.”
“Kaei kaba nga lah ban ong ka long ba lada phi ïaid katkum ki kyndon NDPS, uno uno u briew uba kurup drok, bad u drok u don ha ka kti jong u, u kylla long ma u, uba hap ban batai balei ba u drok u don ha ka kti jong u. Kata ka long ka ain jong ka ri. Kumta ka long kaba shai, ha kaba ngi pyrshang ban pynheh ïa ka jingthew jong ka jingtreikam jong ngi,” u la bynrap.
U la ong ruh ba kan dei ha ka sien kaba nyngkong ba ka tnat Social Welfare ka la ïuh kjat ha kane ka bynta, ha kaba ki la long trei shitom ban ïakhun pyrshah ïa u drok.
“Kham mynshwa, ka dei tang ka tnat Pulit. Mynta ngi don ïa ka Dream Mission kaba khlieh da u Myntri Rangbah ka Jylla. Ka pyni ïa ka kyrdan jong ka jinglong khia jong ngi, bad ngi kwah ban leh ïa kiei kiei ha ka rukom ba ngi don ïa ka jingïada jong ka aiñ, khnang ba ngin ym don ha ka liang kaba bakla jong ka aiñ,” u la bynrap.
