Shillong, Risaw 17
Ka Congress ha ryngkat u MP ka Tura u Saleng A Sangma ka la sei da u kyrtong uba dei u ‘Post Graduate’ ban ïakhun pyrshah ïa ka National People’s Party (NPP) bad All India Trinamool Congress (AITC) ha ka ilekshon MLA shiteng samoi na Gambegre konstitwensi ka ban thep ‘vote’ ha ka 13 tarik Naiwieng 2024.
Une u kyrtong ka Congress u dei uba la pyndep ïa ka jingpule ‘Post Graduate’ u dei u Jingjang M Marak, bad ïa ka kyrteng jong u la pynbna kum u kyrtong ka seng na Gambegre konstitwensi da u General Secretary ka All India Congress Committee (AICC), u KC Venugopal ha ka Sngi Palei.
Katkum ki kot ki sla kiba don bad ka AICC, la ong ba u Jingjang u dei u dkhot ka ‘War Room ha ka ilekshon MP na Tura bad ka seng kaba la bynshet ruh ïa u kum u In-charge ka Garo Hills.
U Venugopal u la pyntip ba u President rangbah ka Congress, u Mallikarjun Kharge u la ai jingmynjur ïa ka kyrteng u Jingjang ba un long u kyrtong ka seng ha ilekshon MLA shiteng samoi na Gambegre konstitwensi.
Haduh mynta, ki la don lai ngut ki kyrtong ki ban ïakhun ïa ka ilekshon shiteng samoi. Nalor u Jingjang uba dei u kyrtong ka Congress, kiwei pat ki kyrtong kiba la dep ban pynbna ban ïakhun ki long ka Dr Mehtab Chandi Agitok Sangma kum ka kyrtong ka NPP bad ka dei ruh ka kurim jong u Myntri Rangbah u Conrad K Sangma, nalor ka AITC kaba la rai ban pynïakhun da ka MDC ka Garo Hills Autonomous District Council (GHADC) ka Sadhiarani M Sangma, kaba dei ruh ka kurim jong u Myntri Sorkar barim u Zenith M Sangma.
Ki kyrtong ki ban ïakhun ha Gambegre kin kham bun shuh ynda la pynbna kyrtong sa ka BJP, bad lada mih sa ki kyrtong shimet.
Ka jingïakhun ha Gambegre ha kane ka ilekshon MLA shiteng samoi kaba mynta, kan dei ruh ka jingïakhun na ka bynta ka burom (prestige) namarba ka NPP kaba don ha ka bor synshar bad ka Congress kaba bat ïa ka Gambegre baroh shikatta ki hap ban ïakhun tyngeh ban ïoh bat ïa kane ka konstitwensi.
Lada ka NPP ka ïoh jingjop kan long ka burom kum ka seng kaba ïalam ïa ka Sorkar bad lada ka Congress kan ïoh jingjop kan long ka burom namar ka la lah ban bat biang ïa ka Gambegre kaba la ju mihkhmat da u MP ka Tura u Saleng A Sangma ha kine ki snem kiba la leit.
U Saleng u la iehnoh ïa ka Gambegre konstitwensi kum u MLA ka Congress ha ka 10 tarik Jylliew, 2024 hadien ba u la shahjied kum u MP ka Tura ha ka ilekshon Lok Sabha mynta u snem.
Kumta ka jingïakhun kan long kaba itynnat ha Gambegre namar kiba bun ki nongïalam jong ki seng saiñ pyrthei kin leit sha Gambegre ban ïalap ilekshon ban khring ïa ki paidbah ba kin ai jingkyrshan na ka bynta ki kyrtong jong ki.
