Shillong, Risaw 17
Ki nongïalam ka BJP na Meghalaya ki la shah khot sha Delhi ha kaba ki mat ki ban ïakren bad ki nongïalam kiba halor kan dei halor ka ilekshon MLA shiteng samoi ha Gambegre konstitwensi nalor ka jingpynkhlaiñ ïa ka seng lyngba ka jingpynrung dkhot shuh shuh ha kane ka Jylla.
Haba kren sha ki lad pathai khubor ha ka Sngi Palei, u nongïalam ka BJP u Bah A.L Hek uba dei ruh u Myntri ka Sorkar Jylla u la ong ba ki nongïalam ka BJP na Meghalaya kin hap leit sha Delhi na ka bynta ka jingïalang ka ban long ha ka 21 tarik mynta u Risaw bad ki mat ki ban sa ïakren ki dei na ka bynta ban pynbun shuh-shuh ka jingpynrung dkhot hapoh ka seng nalor ka jingïakren ha kaba ïadei bad ka ilekshon MLA shiteng samoi ha Gambegre konstitwensi.
Haba kylli balei ka BJP ka pynslem ban pynbna kyrtong ban ïakhun ha ka ilekshon shiteng samoi, u Bah Hek u la ong ba ka seng ka ïaid katkum ki kyndon ha ryngkat u President ka BJP Meghalaya bad ki nongïalam ka seng na Delhi ki ban sa pynbna shen ïano kan ai tiket.
U la ong ba ki don katto-katne ki kyrteng tangba haduh mynta tang u MDC ka BJP u Bernard Marak uba la thep kyrteng na ka bynta ka tiket.
Haba kylli hato ka BJP ka sngewthuh ba ka donkam ban ïakhun hi namar kam long kaba biang ban kyrshan ïa ka NPP kumba long ha ka ilekshon Lok Sabha, u Bah Hek u la ong ba ka BJP kam donkam ban pule ne sngewthuh na ka ilekshon MP namar ka khlem ïakhun ha ka ilekshon MP, hynrei mynta kan sei ïa la u jong u kyrtong u ban ïakhun ha ka ilekshon MLA shiteng samoi na Gambegre konstitwensi.
U la ong ba ki don ki kyrteng jong kiba kwah ban pan tiket hynrei haduh mynta tang u Bernard marwei uba la pan tiket bad shen ki nongïalam ka BJP na Delhi kin sa pynbna mano ban long u kyrtong jong ka seng.
Ka NPP, All India Trinamool Congress (AITC) bad Congress ki la dep pynbna ïa ki kyrtong jong ki na ka bynta ka ilekshon shiteng samoi ha Gambegre konstitwensi.
