Shillong, Risaw 17
Ka jingshah tuh jong ki kali bad ki arshaka ki dang bteng beit jan manla ka sngi na kawei ka jaka sha kawei pat. Dang ha kine ki sngi ruh ka la don biang ka jingshah tuh jong kawei ka kali bad kawei ka arshaka.
Katkum ka khubor kaba la ïoh na ki pulit la ong ba u Kenny D Kharkongor u la ai ka jingujor ba ha ka 14 tarik mynta u bnai, ki runar bym lah ban ithuh ki la tuh ïa ka kali Jeep ka jong u, kaba don ïa u registration number ML05-4956 ryngkat bad uwei u generator bad ki waïar na ka shnong Mawthei kaba hap hapoh ka thanad Umiam ha Ri-Bhoi District.
Ha kawei pat ka khubor, u Pynjanai Nongsiej u la ujor sha ki pulit ba ha ka 15 tarik mynta u bnai, ki runar bym lah ban ithuh ki la tuh ïa ka arshaka ka jong u kaba don ïa u registration number ML05-U-1555 na ka thaiñ Laitumkhrah, Shillong.
Ha kaba ïadei bad kine ki jingujor, ki pulit ki dang pynlong ka jingtohkit ban thwet ïa ki briew kiba donkti ha kine ki kam tuh.
Ha kawei pat ka khubor, uwei u nongshong shnong jong ka shnong Kandargaon kaba hap hapoh ka thanad Rajabala ha West Garo Hills u la ujor ba ha ka 13 tarik mynta u bnai ha ka por kumba 11 baje mynmiet, san ngut ki nongshong shnong jong katei ka shnong, ki la shoh bad tied ïa u para jong u, hapoh shnong, ha kaba u la mynsaw jur bad la hap ban pynkit noh mar mar sha ka jaka ai jingsumar.
