Shillong, Risaw 17
Ki shipai ïada ri jong ka Israel ne ka Israel Defense Force (IDF) ki la ïoh ban pynkyllon ïap ïa ki lai ngut ki lehnoh bym lah ban ithuh ha ka por jong ka jingkhynra kaba la pynlong ha Gaza, la ong ka kyrwoh khubor. Ki shipai ki la suba jur ba uwei na ki lehnoh ba la khlad noh u lah ban dei u heh ka Hamas u Yahya Sinwar.
Ka IDF bad ka ISA ki dang wad bniah halor kane namar ha kane ka por ym pat lah satia ban pynthikna ïa ka kyrteng jong kine ki lehnoh kiba la kyllon ïap.
Ki shipai ha ka kyrwoh khubor ha ka sngi Palei ki la ïathuh ba lai ngut ki lehnoh ki la shah pynïap ha ka por jong ka jingïakhun ha Gaza, khlem da batai bniah.
La ong ba haduh mynta ïa ka kyrteng jong ki lai ngut ym pat lah ban pynthikna, hynrei dang peit bniah bad suba ba uwei na ki lai ngut u lah ban dei u Yahya Sinwar.
Katkum ka jingpynbna, ym shym la don dak eiei ba kin don ki nongshah rahbor ha ka building ba la shah pynkyllon ïap ki lehnoh. Ki shipai kiba la pynïaid shakhmat ïa kane ka kam, ki dang bteng ban khynra da kaba peitngor bha, ong ki shipai Israel (IDF).
Na ka bynta ki bym pat tip, u Yahya Sinwar u dei uwei na ki chief architects ne u nongshna ba tbit jong ka jinghiar thma ba shyrkhei jong ka Hamas ïa ka Israel ha ka 7 tarik u Risaw, 2023. U la shah jied ruh kum u nongïalam ba hakhlieh duh jong ka kynhun hadien ka jingshah pynïap noh jong u Ismael Haniyeh ha u bnai Naitung ha ka jinghiar thma jong ka Israel ha ka nongbah Tehran jong ka Iran.
Hashwa jong kane, ki shipai jong ka Israel, ki la hiar thma ïa kawei ka skul kaba don ha Gaza bad ha kaba 15 ngut ki briew ki la kyllon ïap, ba kynthup ïa 5 ngut ki khynnah.
Ki shipai Israel, ki ïathuh ba katei ka jinghiar thma, ka dei ïa ki phew ngut ki ehrang jong ka Hamas bad Islamic Jihad, kiba la ïalum lang ha ka skul Abu Hussein ha Jabaliya, kaba dei ka ktem phetwir ha sor, kaba don ha Gaza.
