Shillong, Risaw 17
Ka Hynñiewtrep Integrated Territorial Organisation (HITO) Sengkmie ha ka 17 tarik u Risaw 2024 ka la leit ban mih sha ka ophis treikam jong ka Meghalaya State Pollution Control Board (MSPCB) kaba don ha Lumpyngngad ban buddien ha kaba ïadei bad ka dorkhas ba la aiti da ka HITO Narpuh Circle ha u Deputy Commissioner ka East Jaiñtia Hills District, u Shivansh Awasthi, IAS, ban pynpaw ïa ka jingpyrshah kaba jur halor ka jingthmu jong ka Meghatop Cement Pvt Limited ban pynlong ïa ka jingpynsngew paidbah ne ka ‘Public Hearing’ ha ka 18 tarik u Risaw 2024 na ka bynta ban tei ïa ka karkhana pynmih dewbilat hapoh ka shnong Wahïajer Narpuh, East Jaiñtia Hills District.
Haba kren sha ki lad pathai khubor, u President ka HITO u Bah Donbok Dkhar u la ong na ka liang ka seng ka la dep ban aiti biang sa shisien ïa ka dorkhas sa ha u Member Secretary ka MSPCB u Dr. GH Chyrmang, MFS, bad pynpaw ba ka daw ba ka seng ka la pyrshah jur ban pynïeng ïa kane ka karkhana ka dei hadien ba ki paidbah nongshong shnong ka thaiñ ki la ud la nam shikat dei eh halor ka jingjyllei ki karkhana ka bym wanrah satia ïa kano-kano ka jingïoh jingmyntoi ha ka ïoh kam-ïoh jam namar hapoh kitei ki karkhana la thungkam tang da ki bar jylla suda.
U Bah Donbok u la ong ba ki paidbah kim dei satia ban shah pynbiej bad shah pynngop ha ki trai jong katei ka karkhana tang lyngba ka jingïoh ïa ka lut kaba T.2000 ne T.3000 namar lehse, kan sa poi ka por ba kin sa hap ban kit ïa u tyndong lyer ban ring mynsiem namar ka jingjur eh ka lyer kaba sniew kaba mih na kitei ki karkhana.
Shuh-shuh u Bah Donbok u la ïathuh ba ki la don katto-katne ki paradoh-parasnam na ka bri u hynñiewtrep kiba la don ka jingïadei bad ïatreilang bad ki trai jong katei karkhana ha kaba ki la thong ruh ïa ka seng da ka pisa kumba T.20 lak ba kan ym kren eiei ne ban ym pyrshah halor kane ka karkhana hynrei na ka liang u Bah Donbok u la ther kylla ïa kitei ki briew da kaba ong ba katno tyngka ka karkhana ka donkam pisa ban pynsangeh mardor ïa katei ka jingïalang paidbah jong ka karkhana.
U la ïathuh ruh ba kitei ki briew kiba la phone ïa u, ki la ong pynban ba kum ka seng kam dei ban tuklar ïa ki kam hapoh ka thaiñ Narpuh kaba dei ka jaka ba thmu ban pynïeng ïa katei ka karkhana namar ki nongïalam ka seng kim dei satia kiba shong-ba sah hapoh katei ka thaiñ.
“Nga kwah ban ong ïa utei u briew ba uno-uno u nongshong shnong jong ka hynñiewtrep u dei beit u Khasi bad u nongshong shnong jong ka bri u hynñiewtrep”, ong u Bah Donbok.
U Bah Donbok u la ïathuh ruh ba u trai jong katei ka karkhana u la phah da utei u Khasi uba la long ruh teng uwei na ki nongshakri paidbah ban wan ong sha ka seng ba kum ki nongïalam ka seng ki dei ban shim beit ïa katei ka pisa ba la ai da ka karkhana bad ban ym patiaw satia ïa ki briew kiba sah ha katei ka thaiñ.
U la kyrpad ruh ïa kiwei ki para seng ba kim dei ban shah pynngop ha ka bor pisa hynrei ba kin mih lang sha madan ha ka 18 tarik u Risaw ban pynpaw ïa ka jingpyrshah kaba jur ïa ka jingthmu ban wanrah ïa ka karkhana hapoh ka shnong Wahïajer Narpuh.
