Shillong, Risaw 18
Ka United Democratic Party (UDP) ha ka Sngi Thohdieng ka la lum ïa ka jingïalang Central Executive Committee (CEC) ban ïakren halor ki jingpynkhreh ba ïadei bad ka ilekshon ban wan sha ka Khasi Hills Auto-nomous District Council bad Jaiñtia Hills Autono-mous District Council (KHADC bad JHADC).
“Ngi la pan kaiphod na ki distrik bapher-bapher bad kaba sngewtynnad ka long ba baroh ki distrik hapoh Ri-lum Khasi bad Jaiñtia – ka jing pynkhreh ka la long kumba 70% bad kiba bun ki konstitwensi ki la dep ban jied ïa ki kyrtong,” ong u Working President ka UDP, Bah Titosstarwell Chyne haba kren sha ki lad pathai khubor hadien ka jingïalang CEC. Haba kdew ba ka seng ka long kaba la khreh ban ïakhun ïa ka ilekshon MDC, u la ong, “Kam da dei eh ba ngi pynkhreh tang ba la dei ka por ban ïaleh ilekshon. Ha ka jingshisha kum ka seng bad na ka liang jong nga ruh nga la kren shai ba ngi la kwah ban long ka ilekshon naduh ka snem kaba la dep, hynrei phi la ïohi ïa ki jingkylla ha kaba la don ruh ka ‘Delimitation Committee’ ïa kaba ka ïing ka la mynjur bad nga kyrmen ba ka ilekshon kan long hi kumba la khmih lynti ha kane ka snem ban wan.” U la ong ruh ba ka seng ka don ïa ka nongrim kumno ban leit biang sa shisien sha u paidbah naba ka sngew donbok ba ha kane ka samoi ba la dep, ïa ka EC hapoh Ri-lum Khasi, la ïalam da ka UDP naduh ka snem 2019 haduh u Jylliew jong u snem 2023.
“Ha kine ki 4 snem hapoh ka jingïalam ka UDP, ngi la ïoh ban leh shibun ki kam ha kaba ki la don ki ‘Bill’, ki la don ki kam kiba ngi la trei bad nga kyrmen ba kum ka seng, ngi long kaba la pynkhreh ban leit biang sha u paidbah,” ong u Bah Chyne. Haba kylli la kan don ne em ka jingïatreilang bad ka HSPDP, u la ong, “Ka jingïasngewthuh jingmut ka don haduh mynta, hynrei ngim pat shim rai ha kano ka rukom ngin ïatreilang ha kane ka ilekshon ban wan. Hynrei ka jingïatreilang hapoh RDA haduh mynta ngi dang ïadon. Ngi don kajuh ka jingïasngewthuh jingmut.” U la ïathuh ruh ba kan sa don ka jingïalang jong ka RDA ha kaba yn sa ïatai bha ha kano ka rukom kane ka jingïatreilang kan ïaid shakhmat khamtam haba ïadei bad ka ilekshon MDC.
Haba bynrap halor katei ka bynta, u General Secretary ka seng, Dr. Jemino Mawthoh u la ong, “Ka lah ruh ban don ka jingïasam konstitwensi…kan shong ha ka jingïasngewthuh jingmut namar ngi la ïadonlang la slem bad ka jingïadei ka bit ka biang. Kumta kam don jingeh haba phai sha ka bynta ba ïadei bad ka jingïasam konstitwensi…ka shong katkum ki konstitwensi, ha kiba khlaiñ ma ki, ka lah ban don ka jingïasngewthuh jingmut bad ha ki konstitwensi ba ngi khlaiñ, ngi lah ban don ka jingïasngewthuh jingmut.” Ka seng kan pynlong ïa ka General Council ha ka 6 tarik Nohprah ha kaba kan pynbna ruh ïa ki kyrteng jong baroh ki kyrtong (KHADC bad JHADC) bad pyllait ruh ïa ki mat treikam jong ka.
