Shillong, Risaw 18
Ka Sorkar Jylla ka la rai ban wanrah la ka jong ka aiñ na ka bynta ban sdang ïa ka jaka pule doktor ha ka skulbah shimet, ka University of Science and Technology Meghalaya (USTM).
Haba kren sha ki lad pathai khubor hadien ka jingïalang jong ka Kynhun Myntri ha ka Sngi Thohdieng, ka Myntri kaba peit ïa ka tnat ka koit ka khiah bad ka tnat aiñ, ka Kong Ampareen Lyngdoh ka la ïathuh ba ka kynhun Myntri ka la ïatai halor ka jaka pule doktor jong ka USTM kaba dei ban sdang noh mynta u snem, hynrei ka Sorkar Jylla ka la shim ïa ka rai ba ïa kane ka jaka pule doktor ym lah ban shu sdang kumto khlem da don da ka aiñ kaba dei ban peit ban khmih ïa kane ka jaka pule.
Kumta ka Kynhun Myntri ka la rai ban wanrah noh la ka jong ka aiñ na ka bynta kane ka jaka pule doktor ha USTM ha kaba ka tnat ka koit ka khiah ka hap ban shong pyrkhat ha kine ki sngi bad ban pynkhreh ïa ka aiñ. Ka Kong Ampareen ka la ong, ban pynkloi ïa ka kam, donkam ban wanrah noh shwa da ka aiñ kaba shipor lane Ordinance namar ba kane ka jaka pule doktor ka hap ban sdang noh ïa ka jingai jinghikai mynta hi u snem.
Ka Kong Ampareen ka la ong ruh ba ka Sorkar Jylla ka hap ban peit ban khmih ïa ka jaka pule doktor namar ka don ruh ka hukum kaba pynmih da ka Supreme Court bad ka long kaba donkam ban bud bad ïaid katkum ka aiñ.
Kum ban pynkynmaw, ka Jylla ka dei ban ïoh bhah 40 ngut ki samla kiba dei ban leit pule doktor ha USTM ha kaba kane ka skulbah ka la ainam ha ka kyrteng u nongïalam ba la khlad noh u P.A Sangma.
