Shillong, Risaw 18
Ka All Khasi Meghalaya Tourist Taxi Association (AKMTTA) ha ka Sngi Thohdieng jong ka 18 tarik u Risaw, 2024 ka la leit sha ka jingïalang ba la khot da ka tnat Jngohkai ka Sorkar Jylla na ka bynta ban ïakren halor ki mat kiba ïadei bad ka kam jngohkai kynthup halor ka jingdawa jong ka seng ban pyrkhing noh ïa ki kali kiba wan nabar ka Jylla ban kit ïa ki nongwan jngohkai shaduh ki jaka jngohkai bapher-bapher kiba don hapoh ka Jylla.
Ha kane ka jingïalang ka kynhun ka la ïoh ban pynsngew sha u Director ka tnat jngohkai ka Jylla, u Bah Cyril V. Diengdoh ïa ki katto-katne ki jingai jingmut bad ki jingdawa. Ka jingdawa kaba kham kongsan ka long na ka bynta ban pyntreikam noh ïa ka ‘Reciprocal Transportation Agreement’ kumba la pyntreikam ha kiwei pat ki Jylla.
Hadien ba la wai ka jingïalang, ki nongïalam ka AKMTTA ki la ïathuh ba na ka liang u Director ka tnad kam jngohkai u la bthah ïa ki nongïalam ka kynhun ba kin wanrah da ka jingthoh ïa ki mat jingdawa khnang ba ka Sorkar kan ïoh ban peit bniah ïa kita ki mat jingdawa jong ki.
Haba kren sha ki lad pathai khubor, u Bah Kyrmen Uriah uba dei u nongaiktien jong ka AKMTTA, u la pynshai ba ki trai jong ki hotel, ki Guest house bad kiwei-kiwei ki shnong kiba pynïaid ïa ki jaka jngohkai jong ki, kim dei ban sngewthuh bakla ba kane ka jingdawa jong ki nongñiah kali tourist kan ktah ïa ka kamai-kajih jong ki hynrei ki dei ban ïatreilang bad ki, bad u la ong ruh ba lada ki kwah ïa ka jingpynshai, ki lah ban khot da ka jingïakren bad ki.
U Bah Uriah u la ong ba ïa ka ‘Reciprocal Transportation Agreement’ ka dei ïa kaba la pyntreikam hapoh ka Jylla Sikkim hapdeng ka Sikkim bad ka West Bengal bad lyngba ka jingpyntreikam da ka ‘Reciprocal Transportation Agreement’, ka la wanrah jingmyntoi shikatdei eh ïa ki trai bad ki draibar nongñiah kali kamai kiba dei napoh Sikkim ne West Bengal.
“Kam don shuh kata kaba noh shiliang ïa kano-kano ka Jylla ne ïa kino-kino ki draibar bad kane ka sobjek kumba ka long mynta, ka dei kaba dang thymmai namar mynne haba ngi wanrah ha kane ka komiti, nakaliang u shongknor u la ong ba kane ka sobjek ka dei kaba dang thymmai bad ka donkam ban aiti sha ka tnad Transport khnang ba kan ïoh khmih bha ïa kane ka jingïamynjur”, ong u Bah Uriah.
Shuh-shuh u Bah Uriah u ba lada ka Sorkar ka pyntreikam ïa ka ‘Reciprocal Transportation Agreement’ kan nym don jingthut ha satia ha ka lynti ïaid namar kiba bun ki Jylla ki baheh kum ka Jylla Jharkhand bad Odisha ki la pyntreikam ïa kane ka RTA bad haduh kine ki sngi kane ka RTI ka la treikam bha bad ka la wanrah ïa shibun ki jingmyntoi.
“Lada ka Sorkar Meghalaya ka ïakren bad ka Sorkar Assam, ngi ngeit ba kan don ka jingïasngewthuh ka ban ai jingmyntoi ïa baroh lang”, bynrap u Bah Uriah.
U Bah Uriah u la ong ba kynhun ka la ban jur ruh ïa ka Sorkar Jylla ba kan thaw noh ïa la ka jong ka Motor Vehicle Act (MVA) na ka bynta ka Jylla kumba la leh da kiwei ki Jylla bad na ka liang ka Sorkar ka la pynsngew ba kin dang don hapdeng ka jingïakren halor kane ka bynta.
Na ka liang u President ka AKMTTA, u Bah Ricaldinus Dohling, u la ong ba ki mat jingdawa kiba ka kynhun ka la pynkhreh ban aiti sha ka Sorkar ki la don kumba 7-8 tylli eiei.
U Bah Dohling u la ong ruh ba ka kynhun kan sa lum bad shim ïa ki kyrteng jong ki draibar ha ryngkat ki nombar phone jong ki khnang na ka liang ka Sorkar kan ïoh ban ai ïa ka ‘App’ sha ki khnang ba ki nongwan jngohkai kiba wan sha ka Jylla kin ïoh ban phone ïa kitei ki draibar kiba don ha katei ka ‘App’.
Shuh-shuh u Bah Dohling u la ong ba wat la na ka liang ka kynhun kam pat da don than eh ïa ka jingsngewhun kaba 100% hadien ka jingshong ïa katei ka jingïalang hynrei da ka jingkyrmen, u la ong ba lehse, kitei ki mat jingdawa jong ka seng kin sa treikam ban pynurlong ïa ki mat jingdawa ka kynhun ha kaba ïadei bad ka jingthaw ïa ki polisi na ka bynta ki kam jngohkai.
“Na ka liang jong ngi, ngi la ong ruh ïa ka Sorkar ba kan kham pynkloi ïa kane ka kam namar ngim don por ban wan sha ki jingïalang kiba na kawei ka jingïalang sha kawei pat khnang ba ngin lait noh na ki jingeh bad ki jingshem jynjar jong ngi kum ki nongñiah kali kamai”, ong u Bah Dohling.
U la ong ba wat la na ka liang ka kynhun ka la pynkhreh da ki jingïakhih hynrei kumba ka long pat, kan ailad shwa ïa ka Sorkar ba kan khmih shwa ïa ki jingthoh kiba yn sa phah da ka kynhun.
“Na ka liang jong ngi, ngin sa hap ban sngap ïa ki jingai jingmut jong ka Sorkar bad ka Sorkar ruh ka dei ban sngap ïa kaei kaba ngi ki nongñiah kali kamai ki ai jingmut ïa ka”, bynrap u Bah Dohling.
Na ka liang u Bah Balajied Jyrwa, General Secretary ka Ïatyllilang Tourist Owners and Drivers Association, u la ong ba na ka liang ka Sorkar ka la pdiang ïa ka jingai jingmut jong ka kynhun ban pyntreikam da ka ‘Reciprocal Transportation Agreement’ bad ong ba u khmih lynti ba ka Sorkar kan leh ïa kaba bha tam na ka bynta ka bit ka biang jong baroh.
Na ka liang u President ka Tamabil Bakur Dawki Tourists Taxi Association, Bah Luckystar Mannar, u la ong ba kum ki trai jong ki ‘Guest house’ ne ki ‘Hotel’ kim dei ban don ïa ka jingtieng ba ïoh lehse ki duh kamai noh hynrei ki dei ban sngewthuh ba kane ka jingïaleh ka dei na ka bynta ka Jaitbynriew bad ïa ki nongwan jngohkai pyrthei ruh yn wan pynpoi beit ha ki jaka jong ki.
