Shillong, Risaw:
U Myntri Rangbah ka Jylla, u Conrad K Sangma u la batai bniah ïa ki kam bad jingbuh thong ka Sorkar Jylla hakhmat u Vice President u Jagdeep Dhankar ha ka por ba u leit jngoh ïa ka IT Park ha Umsawli, New Shillong Township ha ka Sngi Balang.
U Vice President ka ri, u la leit sha IT Park ha ka jingsynran lang u Myntri Rangbah bad ki ophisar ka Sorkar Jylla.
Ha kane ka jaka, ki don ruh ki dukan kiba pyni bad die ïa ki tiar ki tar kiba shna bad pynmih da ki kynhun bapher bapher ha kaba u Vice President u la leit jngoh ïa kine ki dukan.
Na ka Liang u Myntri Rangbah u la pynpaw ïa ka jingkmen ban ïoh pyni bad batai hakhmat u Vice President ïa ki kam kiba ka sorkar ka la leh bad ki kam kiba ka thmu ban trei ha kine ki snem ki ban wan ha ryngkat ka jingbuh thong ban pynurlong khamtam ban kyntiew ïa ka lad seng kam bad ai jinghikai pyntbit ïa ki samla ka Jylla.
U Conrad u la ong ruh ba ka Sorkar ka shim lang ïa ka lad na ki skhim ka Sorkar Pdeng ban kyntiew ïa ka ïoh ka kot jong ka jylla, bad u la batai ruh ïa ki kam kiba ka sorkar ka la leh na ka bynta ka jingmyntoi jong ki paidbah ka Jylla.
Na ka liang u Vice President ka ri haba kren ha kane ka sngi, u la ong ba ki jingbatai kiba la pyni da u Myntri Rangbah ka Jylla ki long kiba biang bha bad ki dei kiba lah ban pynurlong, ha kaba u la ai ka jingïaroh ïa ki sienjam kiba ka Sorkar Jylla ka la shim.
U la ong ba ym don kata kaba ong ba ym lah, hynrei ka dei kaba lah ban kynjoh sha kata ka thong kaba la buh.
“Ngam don eiei ban ong hynrei tang ban ong ïaid shakhmat ban kynjoh sha kata ka thong kaba ka jylla ka don na ka bynta ban tei ïa ka lawei jong ki paidbah ka jylla,” la kren ïaroh bad ai mynsiem u Vice President.
