Shillong, Naiwieng 04
Ki kali rim kiba la shah kyntait ha ki jaka lum tiar jot, ki la kylla da kawei pat ka dur ba lah ban pynshohbiej bad ban khring ïa ki riew ieid ïa ki kali rim kiba ha kane ka juk la kham niar ban lap ne shem ha ka nongbah Shillong.
U Bah Ashok Lyngdoh ha ka 04 tarik u Naiwieng 2026 u la lah ban plie paidbah ïa ka Rock Cliff Classic Motors and Antiques kaba don ha Cleve Colony, Shillong ïa kaba u la angnud ban pynurlong ïa kane ka jingthmu jong u mynta la bun-bun snem bha. Haba ïoh ban ïakren u Bah Ashok u la ïathuh ba kane jinglah jong u ban plie ïa kane ka thiar (Museum) ka long kumba ïoh ban kheit ïa u soh ba u la lum bad kynshew la bun-bun snem ïa kaba u la pynpaw ruh ba kine kiba u lum bad kynshew ki dei kiba la sdang ban jah bad la jynjar bha ban ïoh ha kane ka juk.
U Bah Ashok u la ïathuh ba bun na ki kali, ki thuk-thuk u thied na ki jaka lum tiar jot ba na kylleng, u la ong ba ki kali barim kim dei kiba rem dor bad kim da khring ruh ïa ki nongthied ïa kaba ki briew ki la ñiew ïa ki kum ki kali ki bym lah shuh ban pyndonkam, katba ma u pat u don la ka jong ka jingïohi jngai ha la ka jingmut kaba pynlong ruh ïa u ban maramot pynbha bad ban buh kyrpang ïa ki ban pynneh pynsah. U la ïathuh ba ka jingïeit jong u ïa ki kali ka la sdang naduh ka por ba u dang khynnah rit, kum ïa ki Jeep bad kiwei. Hynrei haba nangmih ki snem, kane ka jingieit jong u ïa ki kali ka la pynktik ïa ka dohnud jong u ban kut jingmut ban lum bad pynbha biang ïa ki kali barim.
Haba ki kylli la u dang ñiah ne em ïa kine ki kali, u Bah Ashok u la jubab ba kitei ki kali dang lah ban ñiah da kaba u la pynpaw ba u ju sngewtynnad ban ñiah ïa kine ki kali ha ki sngi u Blei bad ong ba u sngewtynnad ban ïohi ba ki paidbah ba ïaid ba ïeng ha surok ki kmen ban ïohi ïa ki kali rim kiba u la pynwandur itynnad.
U la ïathuh ba ha katei ka thiar (Museum) jong u ki don kumba 23 tylli tam ki kali ba la rim kynthup ki arshaka, ki don ki Jeep Willys, ki Jeep na America bad ki kali Ford kiba naduh ka por ka jingsynshar ki phareng. U la ong ba kine ki kali ba u buh pynneh pynsah ki don kiba naduh u snem 1937, 1950, 1957 bad 1967 nalor kiwei pat bad pynpaw ba kane ka kam ban pynbha ïa ki kali rim kam long kaba suk. U la batai ruh ba kane ka Museum ka plie naduh ka por 11 baje mynstep haduh 4 baje janmiet bad ki briew kiba kwah ban sakhi da la ki jong ki khmat ïa kine ki kali ki lah ban wan jngoh ïa katei ka jaka da kaba u la kdew ruh ba ka dei ka jaka ba jai-jai bad kaba lah ban pynjahthait ïa ki jingmut jingpyrkhat.
