Shillong, Naiwieng 04
Haba ïada ïa ka rai jong ka Sorkar ban kyrshan ïa ka ‘Pre-Christmas Concert’ jong ka KJP Assembly kaba la buh ban long ha ka 12 tarik u Nohprah, u Myntri Rangbah ka Jylla, u Conrad K. Sangma ha ka Sngi Balang u la ong ba ka Sorkar kam kyntiew ïa kano-kano ka niam hynrei ka kyrshan ïa ki briew bad ban long shi bynta jong ki jinglehkmen jong ki ha ka rukom kaba long laitluid ban mane ïa kano-kano ka niam.
Haba jubab ïa ki jingkynthoh jong kito kiba pyrshah, u Conrad u la ong, “Ngi khlem kyntiew ïa kano-kano ka niam hynrei ka jingngeit jong ki paidbah kaba don hangta haba ki lehkmen, ka dei kaei-kaei kaba ki ngeit. Ngi dei tang shi bynta jong ka jinglehkmen. Ngi kyrshan ïa ka imlang-sahlang, ngim jied. Uno-uno uba wan sha ngi, ngi kyrshan.”
Da kaba ai nuksa, u la ong, “Ha kawei ka sngi, ka Balang Presbyterian ka la wanrah ïa kane ka jingai jingmut sha ngi bad ngi la ong hooid, sngewbha ïaid shakhmat, ngin ïadon ryngkat bad phi. Ha kajuh ka por, ka Balang Baptist ka la wan bad ki la ong ba ngi kwah ban leh ïa kane bad nga la ong sngewbha ïaid shakhmat, ngin kyrshan ïa phi. Ki jaidbynriew Bihari ki la wan ha kata ka sngi bad ong ba ngi dang ïaleh ïa ka ‘Chhath Puja’, 100 snem, ngi kwah jingkyrshan, nga ong sngewbha ïaid shakhmat, ngan kyrshan ïa phi.”
“To ngin sngewthuh ba kum ka Sorkar ngim don hangne ym ban kyntiew ne kyrshan ïa kano-kano ka niam, ngi don hangne ban kyrshan ïa ki briew jong ngi. Ngi don hangne ban kyrshan bad ban long shi bynta jong ki jinglehkmen jong ki bad ka long kaba dei ïa ka Sorkar ban leh ïa kata ha ka rukom kaba long pdeng,” u la bynrap.
U Myntri Rangbah ka Jylla u la ong ruh ba ïa kane kajuh ka rukom la bud na ka bynta baroh ki jingngeit.
“Ngi la leh ïa kata na ka bynta man la ka prokram – la ka dei ka ‘Durga Puja’, baroh ki MLA ki kyrshan, ngi kyrshan kum ka Sorkar ha ki rukom bapher-bapher bad dei kumta ba ngi rakhe ïa ka kolshor jong ka jinglaitluid ha ka jingmane niam ha ka ri jong ngi da kaba pyntikna ba ka lad ka kabu kaba ïaryngkat lang bad ka jingburom kaba ïaryngkat la ai sha baroh ki jingngeit bad baroh ki jait niam,” u la ong.
U la ong ruh ba dei da kane ka jingngeit ba ka Sorkar ka la rai ban kyrshan ïa ka ‘Concert’ ïaput-ïatem jong ki Balang.
U Conrad u la ong ruh ba u la bthah ba ïa ki prokram hapoh ka ‘Meghalayan Age’ yn pynlong man ka sngi ha ‘Meghalayan Age Pavilion’ na ka bynta ki nongjngohkai pyrthei, kynthup ïa ki jingrwai kospel ha ka Sngi U Blei.
“Nga la ong ïa ki ba dei ban don ka prokram ‘Meghalayan Age’ man ka sngi namarba ki nongjngohkai pyrthei jong ngi ki don hangtei. Uwei na ki heh ophisar jong nga u la ong ïa nga, ‘Sir’ lait noh tang ka Sngi U Blei. Nga la ong balei lait noh ka Sngi U Blei, ngi lah ban don ki jingrwai kospel ha ki Sngi U Blei bad phin sngewbha ban tip ba tang ha kane ka Sngi U Blei ba la dep, ki don ar-lai ngut ki nongrwai samla jong ngi kiba la rwai ki jingrwai kospel hangtei bad lada don mano-mano ba kwah ban ïohi ne sngap ïa ki jingrwai jong ki lada ki kwah, ym donkam siew eiei, ngi dei ka ri kaba laitluid ha ka jingmane niam kumba ngi ong; bad ka long kaba shai ba ngi burom ïa baroh,” u la ong.
Ïa kane u la kren ha ka jingplie paidbah ïa ka District School Education Office-cum-Multilevel Car Park ha Mawkhar & Multilevel Car Park ha Motphran ha ka jingïadon lang u Symbud Myntri Rangbah ka Jylla ba peit ïa ki kam pynroi sor, u Bah Sniawbhalang Dhar.
