Shillong, Naiwieng 04
Ki pulit ka nongbah Shillong ki la ïoh ban leit pynpait ïa ki tala ba la dep khang da ki ophisar ka Khasi Hills Autonomous District Council (KHADC) kaba la ïalam da u Chief Executive Member Bah Winston Lyngdoh naduh khyrdop bad ki jaka treikam ka Lower Terminal Point kaba don ïa ka projek Ropeway ha Madan Laban kaba la long mynta ka sngi ha ka por mynstep.
Ha kane ka sngi la ïadonlang ki Magistrate ka East Khasi Hills District kiba la pynpait ïa baroh ki tala ba la khang naduh na ka khyrdop ba hakhmat bad baroh ki kamra treikam.
Kum ban shu pynkynmaw ba ïa kane ka Lower Terminal Point bad ka ophis kane ka kompeni ba trei ïa kane ka Ropeway, ka Khasi Hills Autonomous District Council ka la khang tala ha ka 27 Risaw 2026 halor ka nongrim ba ka kompeni kam don ïa ka ‘trading license’.
Ha kane ka jingpynpait ïa ki tala na ka liang ki pulit ki la pynpra da kaba tied da ki tiar ha ka jingïadonlang ki bor pynïaid District bad kumjuh ïa ka jingpahara khnang ban nym don kano-kano ka jinghuri hura.
Kumban shu pynkynmaw u CEM Bah Winston ryngkat ki Enforcement ki la leit ban khang tala ïa katei ka jaka hadien ba ka KHADC ka la pan jingshai haduh ar sien bad kaba pan jingshai khatduh ka dei ha ka 9 tarik Nailur 2026 ha kaba ki la jubab ba kin pynbiang ïa ki kot ki sla.
Ka KHADC ka ong ba kin sa ai ïa ka ‘trading license’ tad ynda kane ka kompeni ka ïoh ïa ka jingbit na ka shnong bad Hima Mylliem, kumta ha ka 27 tarik Risaw ki la leit ban khang tala bad ai por ïa u Manager jong kane ka kompeni ban wan mih ha ophis hapoh hynñiew sngi ban pynbiang ïa ki kot ki sla.
U CEM u la ong ba kane ka jingwan khang tala ka long ban pyni sha ka pyrthei ba kino-kino ki kompeni kiba wan trei kim dei ban iuhroit ïa ka bor ka KHADC.
