Shillong, Naiwieng 04
Hapdeng ki khubor ba don ka jingbym sngewtynnad hapoh ka State BJP hadien ka jingshah leh klet ha ka jingbujli Myntri dang shen, u Myntri Rangbah Conrad K Sangma ha ka sngi Balang u la pynshai ba kam shym la don satia kano-kano ka jingkular ban pynrung Myntri ha ka por ba ki 8 ngut ki MLA ka UDP ki la rung sha ka BJP.
“Ha ka por ba ka don ka jingïakren ha kaba sdang halor ka jingleit pynïasoh ka jong ki, ïa kine kiei-kiei khlem ïakren satia, ka dei beit ka rai ha ka kyrdan jong ki MLA na ka UDP ban rung sha ka BJP bad ha kata ka por kam shym la don ka jingïakren halor kano-kano ka jingpynbeit shuki Myntri,” la ong u Conrad.
U Conrad u la ong ba ka Sorkar Jylla kam shym la don bynta ha kito ki jingïakren bad kam shym la don ruh kano-kano ka jingpyntip kaba pan ïa ka bhah Myntri. U la ong ba ka jingkyrpad ban pynrung ha ka thup Myntri ka la wan tang hadien ba ka BJP ka la kiew ha ka jingbun ki MLA.
“Hooid nga la ïoh katto katne ki phone call kiba kyrpad ba dei ban don ka jingpynbeit ha ka bhah Myntri namar ba ka number jong ki, ka la kiew na ka 2 sha ka 10 ngut bad ha kaba ki la kyntu ba lada ka Sorkar Jylla bad u Myntri Rangbah kin leh eiei ha ka ban ai bhah ha kano-kano ka bynta kaba don ruh,” u la ong. Hynrei u la ong pat ba ka jingpynrung ha ka thup Myntri kam long kaba suk namar ka jingrit ka thup Myntri (limited number).
“Nga la dep ban pynshai shai ba ha kaba ïadei bad ka thup Myntri, ngi don ïa ka thup kaba rit bad baroh kiei kiei ki la biang lypa. Kumta kam long kaba suk na ka bynta jong ngi, hynrei haei bad kaei kaba ngi lah ban leh na ka liang jong ngi, ngin don beit hangta ban trei bad ki paralok ba ïatreilang bad ngi,” la bynrap u Conrad.
