Shillong, Naiwieng 04
Ka Joint Action Committee (JAC) Against Shillong Ropeway Project ka ïeng skhem beit triang ha ka nongrim ban pyrshah ïa ka jingtei ïa ka Ropeway Projek ha u Lum Shyllong bad ban jur ba ka Sorkar ka dei ban pyndam ïa kane ka projek lane ban kynriah noh sha kiwei ki jaka.
Haba kren sha ki nongthoh khubor ka Kong Deborah Marbaniang President JAC ka la kyntu ïa ki Rangbah Shnong ba kin weng noh ïa ka jingïasoi ‘Lease Agreement’ jong ki bad ka Sorkar kaba ka la ong ba ki Rangbah Shnong ki dei tang ki nongpeit nongkhmih ïa ki nongshong shnong ym ba kin leh donbor.
“Ki Rangbah Shnong ki dei tang ki nongpeit nongkhmih ïa ki nongshong shnong, ha ka jingshisha phi dei ban long kita ki Rangbah ban lam lynti ban pyni ïa kaba dei ïa ki khun samla, hynrei phi die lilam ïa ki jaka puta jong ka ri bad ka jaidbynriew khlem da ïoh ïa ka jingmynjur jong u paidbah” la kynnoh ka Kong Deborah.
Ka la pynpaw ruh ba kum ka JAC ka burom ïa ki nongïalam shnong hapoh ka jingïalam jong ki, hynrei kaei kaba paw mynta ka long ba ki nongïalam shnong kim sngap ïa ka sur ba ki paidbah ki la pynsngew bad ban jur ïa ki Rangbah shnong ba kin weng noh ïa ka jingïasoi ‘Lease Agreement’ jong ki bad ka Sorkar.
Shuh-shuh ka la kdew ruh ba naduh ba la sdang pyntrei ïa ka projek bad ba la pynkhyllem ïa ki dieng, ki paidbah ka thaiñ ki la mad ïa ka jingtyrkhong um, kumta ka la ong ba ki nongshong shnong kim kwah ïa katei ka projek.
Ka la ong ba lada ka Sorkar ka ïaid shakhmat ban pyntrei ïa katei ka projek, ka JAC ruh kan dang pynjur ïa ki jingïakhih ban pyrshah.
Haba ïadei ki jingkynthoh ïa ka JAC, ka Kong Olivia Lyngdoh Mawlong ka la pynshai ba ka jingmih jong ka kynhun ban pyrshah ïa katei ka projek ka dei beit tang halor ka jingsngewkhia ïa ka Mariang khlem da don mano-mano ban kynshoit lane ban leh politik ïa kane ka kam, “Ka jingkynnoh ba don ba pynshoi nadien ka dei ka jingpynsngewthuh bakla” ka la ong.
Ka JAC ka pynrem jur ïa ka Sorkar da kaba ong ba ka leh donbor ban leit plie ïa ka khyrdop (Gate) khlem don kano-kano ka jingïakren lane ka jingïasyllok bad kito kiba khang ïa ka khyrdop, ki la ong ruh ba kane ka lah ban dei ba ka NDB kan sa wan ban jurip ïa ka jaka ba pyntrei bad ban pynpaw ba kam don kano-kano ka jingpyrshah ïa ka jingpyntrei ïa katei ka projek.
